Psalms 36 - Bible Ni Thothup

Kireb ko Girdi’

¹ Denen e ma non nib toy’ar u fithik’ i laniyan’ be’ nib kireb; be’ nike faluwes nag Got ma dariy doguwen u wan’.

² Ya bochan e ba tolngan’, ma be leamnag ndabi pir’eg Got e denen rok nge gechignag.

³ Ba kireb e thin rok ma ba sug ko mululufith; dar gonpiy ni nge rin’ e n’en nib gonop ma ba manigil.

⁴ Ma t’ar liyben e tin kireb nnap’an nra thig nga chob; dariy ban’en ni bfel’ nma rin’, ma dariy reb e kireb ni dar l’eg pa’ ngay.

Feni rib manigil Got

⁵ SOMOL, t’ufeg rom ni dabimus e ke t’aw ko pi tharmiy; ma fenam yul’yul’ e ke mada’ nga lanelang.

⁶ Fanam yal’uw e bod fini tolang e burey; ma fenam mat’aw e bod feni to’ar e rigur. Gur e ga ma chothowliy e girdi’ nge gamanman.

⁷ A Got, rib th’ab feni fel’ e t’ufeg rom ni dabimus! Gamad be naf e girdi’ nga tan e taglul’ u pom.

⁸ Gamad be mur ko ggan ni yo’or ni ga be pi’; ka mu pagmad gamad be garbad ko fare lul’ ni aram fel’ngim ni be map’.

⁹ I gur enggin gubin e yafos; ma bochan e tamilang rom ma gamad be guy e tamilang.

¹⁰ Mu ul ul ko t’ufeg rom ngak e pi’in yad manangem, ma ggol ko pi’in yad bmat’aw.

¹¹ Dab mu pag e pi’in tolangan’rad ngar oggad ngog, ara pi’in kireb ngar tulufedgag.

¹² Mu guy e gin ke aw e girdi’ ni kireb ngay. Ni kar thiggad riy ni dakiyag e suwon rorad.