Psalms 29 - Bible Ni Thothup

Laman SOMOL u fithik’ e yoko’

¹ Mu pininged e sorok ngak SOMOL, gimed gubin e pi chon e tharmiy; ngan pining e sorok nga feni gilbugwan nge gelngin nib gel.

² Ngan pining e sorok nga fithingan SOMOL nib th’abi fel’; ngan siro’ ngak en nib Thothup u nap’an nra m’ug.

³ Laman SOMOL e kanrung’ag u daken e yung i day; ni fel’ngin Got e be chob ni dirra’, ma laman e be kumang u regur.

⁴ Laman SOMOL e kanrung’ag ni rib gel gelngin ma ba rir.

⁵ Laman SOMOL e tet’ar e gek’iy ni cedar, ni mus ko yuke gek’iy ni cedar u Lebanon.

⁶ Ir e be gagiyegnag e pi burey nu Lebanon be og ngalang ni bod pifak e garbaw, nge Burey ni Hermon ni be bu key ni bod ba fak e garbaw ni pumo’on.

⁷ Laman SOMOL e be mateg e uluch.

⁸ Laman e be rurug e ted ni desert; be rurug e ted ni desert nu Kadesh.

⁹ Laman SOMOL e rurug e yuke gek’iy ni oak ma ke lufluf yuwan e gek’iy nga but’ ko ngiyal’ ni be tolul gubin e girdi’ u Tempel rok ni be lungurad, “Ke sorok Got!”

¹⁰ SOMOL e be gagiyegnag e pi regur; be gagiyeg nib pilung ni dariy n’umngin nap’an.

¹¹ I SOMOL e ma pi’ gelngin e girdi’ rok mma fal’eg wa’athrad ko gapas.