Psalms 27 - Bible Ni Thothup

Ba meybil nni yibe pining e sorok riy ngak Got

¹ I SOMOL e tamilang rog me ir e bay rog ni be ayuwegneg i yan; dab gu rus ngak be’. SOMOL e be yororiyeg ko riya’; ere dab gu tamdag.

² Ngiyal’ nra cham e girdi’ nib kireb ngog ni yad be guy rogon ni ngar thanged e fan rog, ma ra tun ayrad ngar dol’gad.

³ Ni yug ra longobiyeg baraba’ i salthaw, ma dab gu rus; ni ku yad ra cham ngog, ma gu ra par ni kab pagan’ug ngak Got.

⁴ Kug wenignag ta’a ban’en ngak SOMOL; ta’a ban’en e gu ba’adag, nggu par u lan e naun rok SOMOL u n’umngin nap’an e yafos rog, mu’ug ngat’ nga feni fel’ SOMOL, mu gog ngak ngi i pow’iyeg.

⁵ Ra taw e oloboch ngog ma ir e manaf rog; me teg u lan e Tempel rok ni dabi buch ban’en rog, me teg nga daken ba war nib tolang ko gin ndariy ban’en nra buch rog riy.

⁶ Pi to’ogor rog ni karon’edgag nga longob e bay gu uf ni kug gel ngorad. Bay ug pi’ e maligach ngak SOMOL u lan e Tempel rok ni kug pi’ lamag ngalang u fithik’ e felfelan’; bay gu tang, bay gu pining e sorok ngak SOMOL!

⁷ SOMOL, mu rung’ag lungug ko ngiyal’ ni gu ra piningem! Mu runguyeg ngam fulweg lungug!

⁸ Ke lungum, “Moy ngog.” Ere bay gub ngom, SOMOL;

⁹ dab mu mith rog! Dab mu damumuw ngog; dab mu n’ag e tapigpig rom. I gur e um ayuwegneg; dab mu pageg, dab mu n’igeg. I gur Got, ni ta’ayuw rog!

¹⁰ Ra n’igeg e chitamag nge chitinag, machane SOMOL e ra ayuwegneg.

¹¹ SOMOL, mu fil ngog e n’en ni ga ba’adag ni nggu rin’, mu pow’iyeg u bpa’ i kanawo’ ndariy ban’en nra buch rog riy, ya bo’or e to’ogor rog.

¹² Dab mu n’igeg nga pa’ e to’ogor rog; ni yad be togopluw ngog ko thin ni yad be t’ar nga dakenag ma yad be yog ni ngar rin’ed ban’en ngog.

¹³ Mich u wun’ug ni gu ra guy fel’ngin SOMOL ko biney e tamilang.

¹⁴ Mu pagan’um ngak SOMOL! Nge michan’um ngak, dabi mulan’um. Mu pagan’um ngak SOMOL!