Psalms 26 - Bible Ni Thothup

Ba meybil rok be’ nib mat’aw

¹ A SOMOL, mog ni bfel’ e rog, ni bochan e gu be rin’ e n’en ni bfel’ ma rib pagan’ug ngom.

² SOMOL, mu fal’eg i yaliyeg mag sikeng nigeg; mu pufthinnag e pi ar ar rog nge pi leam rog.

³ Ya t’ufeg rom ni dabimus e ir e ma pow’iyeg; fanam yul’yul’ e gubin ngiyal’ nma yal’uwegeg.

⁴ Dagur ma chagil ko pi’in ni dariy rograd ngabang; dariy ragog ko pi’in yad ma dake moding nigedyad.

⁵ Dabug daken e pi’in kireb, ma gu ma liyeg ko kireb.

⁶ SOMOL, kug maluknag pa’ag ni nggu dag ni bfel’ e rog, gu be liyeg e altar rom ni gu be liyor ngom.

⁷ Gu be yon’ tangin e ogmagaer ni gu be weliy murung’agen urngin e gafarig rom ni rib manigil.

⁸ A SOMOL, ba t’uf rog fare naun ni ga ma par riy, ni fa gin tagalim’ nib maluplup’.

⁹ Dab mu unegeg ko pi tadenen ngam thang owchamad; mu teg u orel rok e pi’in tathang e pogofan —

¹⁰ ni pi’in gubin ngiyal’ ni yad ma rin’ e kireb, ma gubin ngiyal’ ni bfel’ u wan’rad ni ngar feked puluwon e sasalap.

¹¹ Ma gag, e tin ni bfel’ e gu ma rin’; mu runguyeg ngam ayuwegneg!

¹² Gub gilaf ko gubin e riya’; gu pining e sorok ngak SOMOL u lan e ulung ko girdi’ rok.