Psalms 25 - Bible Ni Thothup

Ba meybil ni nge pow’iyey SOMOL me mang manaf

¹ Gu be meybil ngom, i gur SOMOL;

² gu be par nib pagan’ug ngom, ya gur e Got rog. Mu ayuwegneg nge dab gu waer nge siy gu tamra’; dab mpag e to’ogor rog ngar giriggad ngog!

³ Pi’in yad be toer ngom e dab ra waergad, machane pi’in nib machreg ni yad ma togopluw ngom e yad ma waer.

⁴ Got, mfil ngog e tirom e kanawo’; mu dag ngog nggu nang.

⁵ Mfil ngog ngu’ug par ni gu ba yal’uw ko thin rom; ya gur e Got rog, ni ga ma aywegeg. Pagan’ug ngom ni gubin ngiyal’.

⁶ SOMOL, gu leamnag fanam gol nge rogon fare t’ufeg rom ni dabimus ni kam dag ni kab kakrom i yib.

⁷ Mu n’ag fan u wun’um e pi denen rog nge tin ug oloboch riy ko ngiyal’ ni ku gub pagel; SOMOL, dab mu pag tilig, ya ga ba gol ma t’ufeg rom e dabimus!

⁸ SOMOL e mmat’aw ma bfel’; mma fil ngak e pi tadenen e kanawo’ ni ngar leked.

⁹ Pi’in nib sobut’an’rad e ma fekrad i yan u daken e bin mat’aw e wo’, mma fil ngorad e tin ir e mm’agan’ ngay ni ngar rin’ed.

¹⁰ Ma pow’iyrad i yan ni yad ba t’uf rok ma ba yul’yul’ ngorad, ni urngin e pi’in yad ma falwok ko motochiyel rok ma yad ma fol ko tin ni yog.

¹¹ SOMOL, mu n’ag fan u wun’um e denen rog, ni bod ni mog ni ga ra rin’, ya denen rog e bpire’.

¹² Pi’in yad ma fol rok SOMOL e yad ra fil rok e re wo’ ni ngranod riy.

¹³ Ma gubin ngiyal’ ni yad ra par ni bfel’ rogorad, ma pifakrad e bay ra tafned e nam.

¹⁴ SOMOL e tafager rok e pi’in yad be fol rok, ma micheg ngorad e m’ag u thilrad.

¹⁵ Gubin ngiyal’ ni SOMOL e gu ma sap ngak ni nge ayuwegneg, me ir e ma lufeg ko oloboch.

¹⁶ Mu sap ngog, SOMOL, ngam runguyeg, ya ma’agirag gag ma kug gafgow.

¹⁷ Mu chuweg e magafan’ rog ni kug aw nga fithik’, ma ga chuwegneg u fithik’ urngin e oloboch rog.

¹⁸ Mu leamnag urngin e gafgow nike tay lanin’ug nge gafgow ni kug tay, ma ga n’ag fan urngin e denen rog.

¹⁹ A mu guy urngin e to’ogor rog; a mu guy gelngin e fanenikay ni yad be tay ngog!

²⁰ Mu yoror rog ngam ayuweg e pogofan rog; mu teg ndab gu waer, ya ku gub ngom ni nggu naf nga tan pa’am.

²¹ Fanag mat’aw nge fanag yul’yul’ e nge mang yoror rog, ya gur e ke pagan’ug ngom.

²² A Got, mu chuweg e girdi’ rom nu Israel ko urngin e gafgow rorad ni kar pired nga fithik’!