Psalms 24 - Bible Ni Thothup

Pilung ni ga’

¹ Fayleng nge urngin ban’en ni bay riy e fen SOMOL, but’ nge urngin e girdi’ ni be par u daken e suwon.

² I sunumeg nga daken fa yungi day nib to’ar ni bay u tan e but’, me filath e def riy u t’ay e rigur.

³ Mini’ e bay mat’wun ni nge yan nga daken e burey rok SOMOL? I mini’ e ra yag ni nge yan ngalan e Tempel rok nib thothup?

⁴ Pi’in machalbog e ngongol rorad nge leam rorad, nda rir tedfan e pi liyos ara rmicheged ban’en miyad thilyeg.

⁵ SOMOL e bayi fal’eg wa’athrad me mat’aw nagrad ngak; I Got e bayi yog ni bfel’ e rorad.

⁶ Aram e pi girdi’ nra yib ngak Got, ni yad ra yib nga p’eowchen e Got rok Jakob.

⁷ Mbinged mban e pi garog nge mus nga rogon, mbinged fapi mab nike kakrom, nge yib fare pilung ni ga’ ngalan e yoror!

⁸ I mini’ e re pilung ni ga’ nem? Ir SOMOL, ni fa’anem nrib gel, I ir fare SOMOL, nma gel ko mael!

⁹ Mbinged mban e pi garog nge mus nga rogon, mbinged fapi mab nike kakrom, nge yib fare pilung ni ga’ ngalan e yoror!

¹⁰ I mini’ e re pilung ni ga’ nem? Fare SOMOL th’abi gel, I ir fare pilung ni ga’!