Psalms 19 - Bible Ni Thothup

Feni sorok Got u fithik’ e pin’en ni sunumiy

¹ Lan e lang e rib gagiyel ni be gilnag buguwan Got! Be m’ug riy e n’en ke rin’!

² Ra reb e rran ma be yog ngak e bin ni bay yib e rran; ra reb e nep’ ma be yog ngak e bin ni bay yib e nep’.

³ Dariy ba welthin ara yu bugithin ni ka ni maruwel ngay, dariy lingrad ni yibe rung’ag;

⁴ machane lamrad e be taw ngak urngin e nam, thin ni yad be weliy e be taw ko gin ni mus e fayleng riy. Got e ke toy tafen e yal’ ngalan e lang;

⁵ ma yib nga wean ni kadbul ni bod be’ nib mo’on ni nge mabgol nib felfelan’, bod ba girdi’en e gosgos nib pasigan’ ngay ni nge un ko sagreng.

⁶ Be tabab u baraba’ e lang, nge yan i aw nga but’ nga baraba’. Dariy ban’en nrayag ni nge mith u gowelngin.

Motochiyel rok SOMOL

⁷ Motochiyel rok SOMOL e rib yal’uw, ra pasignag lanin’uy me pi’ gelngiy; ma tin be yog ni murung’agen SOMOL e ba riyul’ mma pi’ e gonop ngak e pi’in ndariy rorad.

⁸ Tin keyog SOMOL ni ngan rin’ e mmat’aw: pi’in ni be fol riy e ke felan’rad. Tin keyog SOMOL ni ngan rin’ e ba yal’uw, mma ayuwegey nge tamilangan’uy.

⁹ Madgun SOMOL ni bay u wun’uy e bfel’, ya ra par ndabi m’ay bi’id; urngin e tin ma turguy SOMOL e ba yal’uw, ya gubin ngiyal’ nma yan i aw nrogon.

¹⁰ Ya motochiyel rok e kabfel’ u wun’ug ko gol, ni mus ko tin th’abi fel’ e gol kab athibthib ko honey, ni honey ndawor ni athkuy ban’en ngay.

¹¹ Ma tamilang nigeg, i gag e tapigpig rom; fol ni gu be tay riy e be yib puluwon ngog.

¹² Dariy be’ nrayag ni nge guy e kireb rok; SOMOL, mu chuwegeg u fithik’ e kireb rog nib mith.

¹³ Ma ku dab mu pageg, nggu duwgiliy ni nggu rin’ e kireb; dab mpag rad ngar gagiyeg niged gag. Ma aram me yag ni gu yal’uw, mu gu par ni gamow ba dar e kireb ko denen.

¹⁴ Mange yigi par e thin u langag nge leam rog ni bfel’ u wun’um. A SOMOL, manaf rog ma tabyul rog!