Psalms 148 - Bible Ni Thothup

Tharmiy nge but’ e nge pining e sorok ngak Got

¹ Ngu’un pining e sorok ngak SOMOL! Ngu’um pininged u tharmiy e sorok ngak SOMOL, ni gimed e pi’in gimed be par u tharmiy nib tolang ngalang!

² Gimed urngin e pi engel rok, mpininged e sorok ngak, ni gimed urngin e yu raba’ i salthaw rok nu tharmiy.

³ Yal’ nge pul, mu piningew e sorok ngak; gimed e pi t’uf ni be gal rama’med, mpininged e sorok ngak!

⁴ Pi tharmiy ni th’abi tolang ngalang, mu pining e sorok ngak, nge gimed e ran ni gimed bay u daken lanelang!

⁵ Yad urngin ni ngu’ur pininged e sorok nga fithingan SOMOL! Ya non, miyad sum;

⁶ i non me bagayad me yan i par nga tagil’ ni bay i par riy ndariy n’umngin nap’an, ma dabiyag ni nge dab ra folgad.

⁷ Mu pininged e sorok ngak SOMOL u fayleng, ni gimed e nig ni gang’ nge urngin yang u t’ay e regur;

⁸ nge uluch nge ayis nike el, nge ayis nib munguy nma mul u lang nga but’, nge pi manileng, nge nifeng nib gel ni be fol ko thin rok!

⁹ Gimed e yungi ted nge pi burey, mu pininged e sorok ngak, nge gimed e yu ke gek’iy nma yib wom’ngin nge gek’iy u fithik’ e garger;

¹⁰ nge gimed urngin e gamanman, ni tin ni mongmor nge tin malboch, nge gamanman nma sirgig u daken e but’ i yan nge pi arche’!

¹¹ Gimed e pi pilung nge girdi’en urngin e nam, nge pi’in yad ma yog e thin nge urngin e pi’in yad ma gagiyeg, mu pininged e sorok ngak;

¹² nge gimed e pagel nge rugod, nge pi pilibthir ma ku er rogon e bitir!

¹³ Yad urngin ni ngar pininged e sorok nga fithingan SOMOL. Fithingan e ir e th’abi ga’ u fithik’ urngin e ngachal; ma feni sorok e ba tolang ko fayleng nge tharmiy!

¹⁴ I ir e be gagiyegnag e birok e nam be par nib gel, ya nge urngin e tirok e girdi’ miyad pining e sorok ngak, ni piyu Israel, nri yad ba t’uf rok! Ngu’un pining e sorok ngak SOMOL!