Psalms 147 - Bible Ni Thothup

Ngan pining e sorok ngak Got ni Gubin ma Rayag Rok

¹ Mu pining e sorok ngak SOMOL! Rib manigil ni nganon’ tangin e sorok ngak e Got rodad; rib fel’ ma ba mat’aw ni ngan pining e sorok ngak.

² I SOMOL e be fal’eg rogon yu Jerusalem ni nge sulweg nga rogon; be fulweg e girdi’ ni ur kalbusgad u bang.

³ Ma be golnag laniyan’ e pi’in ke kireban’rad ma be taflaynag e maad’ad rorad.

⁴ Ir e ke duwgiliy urngin e t’uf ma keyog fithingan reb nge reb.

⁵ Somol rodad e ba gel gelngin ma ba sorok; ma gonop rok e dabiyag i foleg.

⁶ I Somol e ma ayweg e pi’in gafgow, machane ma pirdi’iy e pi’in kireb nga but’.

⁷ Ngan tangnag e sorok ngak SOMOL; min chubeg e musik ko harp ngak e Got rodad.

⁸ Ir e filath e manileng nga lanelang; me pi’ e n’uw ni fan ko but’ me tugulnag e pan u daken e pi burey.

⁹ I pi’ gan e gamanman ma ra pong pifak e raven me durwi’iyrad.

¹⁰ Gathi gelngin e os e ma felfelan’ ngay, ma ku gathi salthaw nib muthan’ e ma felan’ ngay;

¹¹ ya ma felan’ ngak e pi’in yad ma liyor ngak, ni pi’in nib pagan’rad ko t’ufeg rok ni dabimus.

¹² A Jerusalem, mu pining e sorok ngak SOMOL! A Zion, mu pining e sorok ngak e Got rom!

¹³ I SOMOL e ma tay e yoror rom nib gel; ma ir e ma fal’eg wa’athan e girdi’ rom.

¹⁴ Ir e ma tay e mathilin binaw rom nib gapas. ma chum’er nigem ko tin th’abi fel’ e wheat.

¹⁵ Ma duwgiliy e n’en ni nge rin’ e fayleng, ma n’en nma yog e kachingiyal’ nem me yodrom.

¹⁶ Ma filath e ayis ni bod e blangkit me wereg e wa’angchal nike el ni ayis ni bod e fiyath.

¹⁷ Ma pi’ e ayis nib el nge aw ni bod e woyang; dariy be’ nrayag ni nge libeg e garbeb nma pi’!

¹⁸ Ma nap’an nra non, me ranran e ayis; me loeg e nifeng, me yan e ran ni lul’.

¹⁹ Ma pi’ e thin rok ngak e girdi’ rok, ni pi fanow nge motochiyel rok ngak yu Israel.

²⁰ De rin’ e ran’ey ni fan ngak yug boch e nam; ni dar nanged e motochiyel rok. Ke sorok SOMOL!