Psalms 14 - Bible Ni Thothup

Kireb rok e Girdi’

¹ Pi’in balyang e ma lungurad u lanin’rad, “Dariy e Got!” Yad gubin nrib gel e kireb rorad, ka ra ngongliyed bogi ban’en nrib gel e kireb riy; dariy ta’abe’ ni be rin’ e tin bfel’.

² I SOMOL e be changar ngak e girdi’ u tharmiy nga but’ ni nge guy ko bay bochi yad nib gonop, ni yad be meybil ma yad be liyor ngak Got fa dariy.

³ Machane yad gubin ni karanod nga wuru’ e wo’, yad gubin ni ta’reb rogorad ni yad ba kireb; dariy ta’a bagayad ni bfel’, nta’a bagayad ma dariy.

⁴ Me fith SOMOL ni ga’ar, “Gur dar nanged? Gur urngin e pi cha’ney ni yad be ngongliy e kireb e de tamilangan’rad? Kar pired yad be leag u fithik’ e yargel e tirok e girdi’ rog, ma darir meybilgad ngog.”

⁵ Machane bay ra m’ad ko marus, ya Got e be par rok e pi’in yad be folwok rok.

⁶ Girdi’ ni kireb e yad ma gathay e puruy’ rok e pi’in gafgow, machane SOMOL e ir e yoror rorad.

⁷ Ri gu be meybil nu Zion e nge yib e ayuw riy ngak yu Israel! Rib gel e felfelan’ nra tay e girdi’ nu Israel nap’an nra fal’eg SOMOL rograd bayay!