Psalms 137 - Bible Ni Thothup

Meyor ni tay piyu Israel u Babylon

¹ Nap’an ni yib yu Zion nga lanin’mad ma gamad par nga but’ u to’oben e yu pa’ i lul’ nu Babylon ngu’ug yorgad.

² Ma gamad the’ e pi tatelin e musik romad ni harp nga l’ugun yu ke gek’iy ni willow ni bay u to’obmad.

³ Ma pi’in kar koled gamad ko mael e rogned ngomad ni nggu tanggad; rogned ngomad ni nggu tang niged yad ni lungurad, “Mon’ed reb e tang ni murung’agen yu Zion nggu rung’aged!”

⁴ Uw rogon ni nggon’ed e tang rok SOMOL u lan yugu reb e nam?

⁵ Jerusalem, fa’anra gu pag talim, ma mang e yigi yan i aw ndabkiyag ni gu chubeg e harp bayay!

⁶ Ma fa’anra dab kumub ngan’ug, ara dab ku gu leam nigem ni gur e felfelan’ rog nth’abi ga’, ma mang e yigi yan i aw ndabkiyag ni gu tang bayay!

⁷ SOMOL, mu leamnag e n’en ni rin’ e pi Edomite ko fa rofen nem nni kol yu Jerusalem ko mael. Mu leamnag rogon ni i lungurad, “Mu buthuged nge mada’ nga daken e but’!”

⁸ Babylon, bay ni kireb nigem! Ra felfelan’ e en ni ir e bayi fulweg labgen ngom ni bochan e tin kam rin’ ngomad,

⁹ ni bayi fek pifakam ni kab ran ngi i morothiyrad nga daken ba war!