Psalms 136 - Bible Ni Thothup

Tang ko Ogmagaer

¹ Ngan pining e magaer ngak SOMOL, ni bochan e ba manigil; t’ufeg rok e ba manemus.

² Ngan pining e magaer ngak Got th’abi ga’ u fithik’ gubin e pi got; t’ufeg rok e ba manemus.

³ Ngan pining e magaer ngak Somol ni Ir e th’abi gel gelngin u fithik’ e pi somol; t’ufeg rok e ba manemus.

⁴ Ri ma’agrag Ir e ma ngongliy e tin th’abi ga’ e maang’ang; t’ufeg rok e ba manemus.

⁵ Gonop rok e ngongliy e tharmiy ngay; t’ufeg rok e ba manemus;

⁶ i filath e fayleng nga daken e day; t’ufeg rok e ba manemus.

⁷ I sunmeg e yal’ nge pul; t’ufeg rok e ba manemus;

⁸ ni yal’ ni nge gagiyegnag e rran; t’ufeg rok e ba manemus;

⁹ nge pul nge pi t’uf ni ngar gagiyeg niged e nep’; t’ufeg rok e ba manemus.

¹⁰ I li’ e tin nganni’ e pagel u pifak piyu Egypt; t’ufeg rok e ba manemus.

¹¹ I gafaliy yu Israel nga wuru’ yu Egypt; t’ufeg rok e ba manemus;

¹² nga rifrifen pa’ nib gel’, nge pa’ nib gel gelngin; t’ufeg rok e ba manemus.

¹³ I sey e day ni Red Sea; t’ufeg rok e ba manemus;

¹⁴ I gafaliy e girdi’ rok riy nga barba’; t’ufeg rok e ba manemus;

¹⁵ ma lumochnag e pilung nu Egypt riy nge salthaw rok; t’ufeg rok e ba manemus.

¹⁶ I gafaliy e girdi’ rok u daken e ted ni desert; t’ufeg rok e ba manemus.

¹⁷ I li’ nge yim’ e pi pilung nib gel gelngin; t’ufeg rok e ba manemus;

¹⁸ me li’ nge yim’ e pi pilung nib gilbugwan; t’ufeg rok e ba manemus;

¹⁹ ni Sihon ni pilung ko Amorite; t’ufeg rok e ba manemus;

²⁰ nge Og ni pilung nu Bashan; t’ufeg rok e ba manemus.

²¹ I pi’ tafarow ko girdi’ rok; t’ufeg rok e ba manemus;

²² ni pi’ ngak yu Israel ni tapigpig rok; t’ufeg rok e ba manemus.

²³ De pag taldad ko ngiyal’ nda mo’waergad; t’ufeg rok e ba manemus;

²⁴ I pithigdad u pa’ e to’ogor rodad; t’ufeg rok e ba manemus.

²⁵ Ma pi’ e ggan ko urngin e yafos; t’ufeg rok e ba manemus.

²⁶ Mu pinged e magaer ngak Got nu tharmiy; t’ufeg rok e ba manemus.