Psalms 135 - Bible Ni Thothup

Ba tang ko sorok

¹ Ke sorok SOMOL! Mu pininged e sorok nga fithingan, gimed e pi tapigpig rok SOMOL,

² gimed gubin e pi’in gimed ma pigpig u naun rok SOMOL, u lan fare Tempel ko Got rodad.

³ Mu pininged e sorok ngak SOMOL, ya ba manigil; mon’ed e tang ni gimed be pining e sorok nga fithingan, ya ba gol.

⁴ Ir e ke mel’eg Jakob ni nge milfan ngak, nge girdi’ nu Israel.

⁵ Gumnang ni SOMOL rodad e ir e ga’, ba ga’ ngak urngin e pi got.

⁶ Demturug e tin ba’adag SOMOL me rin’ u tharmiy ngu daken e fayleng, ngu lan e day ngu t’ay e regur.

⁷ Ir e ma fek yungi manileng ko yoko’ u tungun e fayleng i yib; mma mateg e uluch u fithik’ e yoko’, ma ir e ma l’oeg e nifeng u lan e chibgil rok nge yib.

⁸ I thang owchen gubin e tin nganni’ u fakay u lan yu Egypt ni girdi’ nge gamanman ni ta’reb rogon.

⁹ Mu rom e fal’eg e maang’ang riy nge tin ma balyangan’uy ngay ni nge gechignag fare pilung nge gubin e ga’ ko salthaw rok.

¹⁰ I gothgothey bo’or e nam me thang owchen e pi pilung nib gel gelingrad.

¹¹ I Sihon, ni pilung rok e pi Amorite, Og, ni pilung u Bashan, nge urngin e pilung nu Kanaan.

¹² Me pi’ e binaw rorad ngak e tirok e girdi’; ni pi’ nga Israel.

¹³ SOMOL, gur e gubin ngiyal’ ni bay unognem ni gur e Got; gubin e mfen ni bay um par u wun’rad.

¹⁴ I SOMOL e ra n’ufeg e girdi’ rok; ma ra i kirban’ ngak e pi tapigpig rok.

¹⁵ Fapi got ko pi nam e ni ngongliyrad ko silber nge gol; ni pa’ e girdi’ e ni chamayrad ngay.

¹⁶ Bay langrad, machane dabyag ni ngar nonad, nge owcherad, machane dab ra guyed ban’en.

¹⁷ Bay telrad, machane dabiyag ni ngar rung’aged ban’en; mus ni ngar pogofangad ma dabyag.

¹⁸ Mange yigi gubin e pi’in ni ngongliyrad ni be michan’rad ngorad miyad bod pi liyos nem ni kar ngongliyed!

¹⁹ Mu pininged e sorok ngak SOMOL, gimed e girdi’ nu Israel; mu pininged e sorok ngak, gimed e pi prist rok Got!

²⁰ Mu pininged e sorok ngak SOMOL, gimed e pi Levite; mu pininged e sorok ngak, gimed gubin e pi’in gimed ma liyor ngak!

²¹ Ngan pininged e sorok ngak SOMOL u lan yu Zion, ngu lan yu Jerusalem, ni tafen. Ke sorok SOMOL!