Psalms 132 - Bible Ni Thothup

Sorok nnog ko Tempel rok Got

¹ SOMOL, dab mpag talin David nge urngin e maruwel ni ngongliy.

² SOMOL, mu leamnag e n’en ni micheg, ni mow ni micheg ngom, I gur fare Got rok Jacob, nib Th’abi Gel Gelngin ni ga’ar:

³ “Dab gu wan nga tabinaw rog ara gu wan nga chob;

⁴ dab gu toffan ara gu mol

⁵ nge yan i mada’ ko ngiyal’ ni nggu pir’eg bang ni nge par SOMOL riy, ni nge mang tabinaw ngak fare Got rok Jakob, nib Th’abi Gel Gelngin.”

⁶ Gu rung’aged murung’agen fare Kahol ko M’ag u lan yu Bethlehem, mu gu pir’eged u daken e ted u Jaar.

⁷ Me lungumad, “Ngdarod ko naun rok SOMOL; mired ngdarod ngad liyorgad ngak u p’eowchen ko gin ntagil’!”

⁸ SOMOL, moy ko fare Tempel, ni gur nge fare Kahol ko M’ag, ni ir e pow u gelngim, ngam par u roy ndariy n’umngin nap’an.

⁹ Manga yigi par e pi prist rom ni gubin ngiyal’ ni yad be rin’ e n’en ni bfel; manga yigi garusnag e tirom e girdi’ e felfelan’!

¹⁰ Mmicheg bbugithin ngak e tapigpig rom i David; SOMOL, dab mu n’ag e re pilung nem ni gur e mu duwgiliy ni nge mang pilung!

¹¹ Ri mmicheg bbugithin ngak David, ma dab mu thiliyeg, ya lungum: “Bay gu gagiyegnag reb i pifakam nge mang pilung, me ir e bayi gagiyeg u tomrem.

¹² Fa’anra par pifakam nib yul’yul’ ko m’ag rog nge tin gu pi’ ngorad ni thingar rrin’ed, ma ku er rogon pifakrad ni bay ra boded gur, ni yad e bay u ra manged pilung.”

¹³ I SOMOL e ke mel’eg yu Zion; ba’adag ni nge ngongliy e tabinaw rok u rom, ya ga’ar:

¹⁴ “Irera’ e gin bay gu par riy ndariy n’umngin nap’an; irera’ e gin gu ba’adag ni ngu’ug gagiyegnag.

¹⁵ Bay gu pi’ ngak yu Zion urngin e tin nge yag ngorad; bay gu pi’ e ggan ngak e pi’in gafgow nge fel’ rogorad ko ggan.

¹⁶ Bay gu fal’eg wa’athan e pi prist riy ko urngin ban’en ni yad be rin’, ma tirok e girdi’ riy e bay u ra tanggad ma yad be tolul ko felfelan’!

¹⁷ U roy e bay gu gagiyegnag reb i owchen David riy nge mang reb e pilung ni ba ga’; u roy e bay gu tay riy nge par nib mudugil e gagiyeg ni nge tay e en ni kug turguy ni nge mang pilung.

¹⁸ Bay gu upunguy e pi to’ogor rok ko tamra’, ma gin bayi gagiyegnag e bayi fel’ rogon me mon’og.”