Psalms 126 - Bible Ni Thothup

Ba meybil ni ngan Puf ko Gafgow

¹ Nap’an ni fulwegdad SOMOL nga Jerusalem, ma gowa ba lik’ay!

² Ya u da garusgad, ma gadad be tangnag e felfelan’! Me yog yugu boch e nam murung’agdad ni lungurad, “I SOMOL e ke ayuwegrad, ma rogon nike rin’ e ka ni ngat ngay!”

³ Riyul’ nrogon nike ayuwegdad e ka ni ngat ngay; rib gel e felfelan’ nike yib ngodad!

⁴ SOMOL, mu fal’eg rogmad bayay, nri bod e n’uw ni fulweg e ran ngalan e pi lul’ nike mlik’.

⁵ Mu gagiyegnag e pi’in ni ur wolduggad ma yad be yor ngar kunuyed wom’ngin e woldug rorad u fithik’ e felfelan’!

⁶ Pi’in nranod ni kar feked awochngin e woldug ma yad be yor e bay ra sulod ni yad be tang u fithik’ e felfelan’, ni kar feked i yib e ggan nike yag riy ngorad!