Psalms 124 - Bible Ni Thothup

Got ni ir e ma ayuweg e girdi’ rok

¹ Fa’an mang e da i moy SOMOL u ba’ rodad ma gadad ra di’in? Israel, mu pi’ e fulweg riy!

² “Fa’an mang e da i moy SOMOL u ba’ rodad ko ngiyal’ ni cham e pi to’ogor rodad ngodad,

³ ma kar ful’ed gadad ni ka gadad bafos u gelngin e damumuw rorad ngodad;

⁴ ma aram e ran nike sugbur e ra chibiydad nge fekdad ngabang nge tharaydad e ran,

⁵ ma n’ew ni be cham u fithik’ e ra lumoch nagdad.”

⁶ Ngad pininged e magaer ngak SOMOL, ya de pag e pi to’ogor rodad ngar thanged gadad.

⁷ Kad thaygad ni bod ba arche’ ni thay ko wup ni tay be’ nma kol e arche’; ke kireb fare wup ka da chuwgad riy!

⁸ Ayuw ni be yib ngodad e SOMOL e be yib rok, ni ir e sunumiy e tharmiy nge but’.