Psalms 116 - Bible Ni Thothup

Be’ ni chuweg Got e yam’ u puluwon me pining e sorok ngak Got

¹ Ba t’uf SOMOL rog ya ma rung’ag lungug; ma motoyil ko meybil rog.

² Ma motoyil ngog ni gubin yay ni gu ra pining.

³ Riy’an e yam’ e longbiyeg; dogwen e low ko yam’ e chuchugur ngog; mu gum’ ko marus nge magfan’.

⁴ Ma aram mu gu pining SOMOL ni lungug, “SOMOL, wenig ngom mu ayweg e pogofan rog!”

⁵ I SOMOL e ba wurngan’ ma bfel’; Got rodad e rib marnguy.

⁶ I SOMOL e ma yoror rok e pi’in ndabiyag ni ngar ayuweged yad; nap’an ni gu bay u fithik’ e riya’, me chuwegeg u fithik’.

⁷ Lanin’ug, nge pagan’um, ya SOMOL e rib manigil e tin ke rin’ ngog.

⁸ I SOMOL e ke chuwegeg ko yam’; ke taleg lu’ag ke teg nde yag ni nga ni gel ngog.

⁹ Are gu be yan u p’eowchen SOMOL u roy u but’ ko pi’in yad bfos.

¹⁰ Gu be par ni bay e mich rog, ni mus ko ngiyal’ ni lungug, “Kar gu masengseng,”

¹¹ ni mus ko ngiyal’ ni gu rus me lungug, “Dariy be’ ni nge pagan’uy ngak.”

¹² Be mang e rayag ni gu pi ngak SOMOL nge yan nga puluwon gubin e pin’en ni bfel’ nike rin’ ngog?

¹³ Bay gu chibiy ngalang fare kap ni fan ko mat’aw ngak mu gu pining fithingan SOMOL,

¹⁴ u lan e mu’ulung rok urngin e tirok e girdi’ e bay gu pi’ ngak riy e tin gu micheg.

¹⁵ Rib amith u wan’ SOMOL, nra yim’ reb e girdi’ rok!

¹⁶ SOMOL, I gag e tapigpig rom; gu be pigpig ngom ni bod ni rin’ e chitnag. Gur e ka mu ayuweggeg u pa’ e yam’.

¹⁷ Bay gu pi’ ngom e maligach ni ogmagaer mu gu pi’ e meybil rog ngom.

¹⁸ Bay gu pi’ e tin gu ognag ngak SOMOL u p’eowchen gubin e girdi’ rok,

¹⁹ u lan e yoror ko naun rok SOMOL u lan yu Jerusalem. Ke sorok SOMOL!