Psalms 115 - Bible Ni Thothup

Ri ta’reb e Got nriyul’

¹ Kemus ni gur, A SOMOL, kemus ni gur e thingar ni gilnagem, ma gathi gamad, ni bochan e t’ufeg rom nge fanam yul’yul’ ni dabimus.

² Mang ni be fithmad e pi nam ni yad be ga’ar, “Bu uw e Got romed?”

³ Got romad e bay u tharmiy, ni be rin’ e tin ni be finey.

⁴ Pi got rorad e ni ngongliy ko silber nge gol, ni pa’ e girdi’ e ni ngongliy ngay.

⁵ Bay l’ugunrad, machane dabiyag ni ngar nonod, ma bay owcherad, machane dabiyag ni ngar guyed ban’en.

⁶ Bay telrad, machane dabiyag ni ngar rung’aged ban’en, ma bay p’ethungrad, machane dabiyag ni ngar faraboned ban’en.

⁷ Bay pa’rad, machane dabiyag ni ngar thamiyed ban’en, bay rifrifen ayrad, machane dabiyag ni ngranod; ma dabiyag ni nge yan lungurad.

⁸ Pi’in nra ngongliyed nge urngin e pi’in ke pagan’rad ngorad, e manga ra boded e pi liyos nem ni yad e ra ngongliyed!

⁹ Gimed piyu Israel, um pired ni SOMOL e ba pagan’med ngak! Ya ir e be ayuwegmed ma be yoror romed.

¹⁰ Gimed e pi prist rok Got, um pired ni SOMOL e ba pagan’med ngak! Ya ir e be ayuwegmed ma be yoror romed.

¹¹ Gimed urngin e pi’in bay madgun SOMOL u wun’med, um pired nib pagan’med ngak! Ya ir e be ayuwegmed ma be yoror romed.

¹² I SOMOL e be leam nagdad ma ra fal’eg wa’athdad, bayi fal’eg wa’athan e girdi’ nu Israel, nge urngin e pi prist rok Got.

¹³ Bayi fal’eg wa’athan urngin e pi’in bay madgun u wun’rad, ni ta’reb rogon e pi’in tolang nge pi’in sobut’.

¹⁴ Mang e yigi pi’ SOMOL e bitir ngomed, ni gimed nge pifakmed.

¹⁵ Mang e yigi fal’eg SOMOL wa’athmed, ni Ir e sunmiy e tharmiy nge but’!

¹⁶ Tharmiy e kemus ni SOMOL e mmil suwon ngak, ma fayleng e ke pi’ ngodad e girdi’.

¹⁷ Pi’in nib yam’ e darir pininged e sorok ngak SOMOL, ni pi’in karanod nga’ar ko fare fayleng ni kan th’ab gulungay riy.

¹⁸ Machane gadad, ni gadad bafos, e bay ud pininged e magaer ngak e chiney i yan nga m’on ndariy n’umngin nap’an. Ke sorok SOMOL!