Psalms 113 - Bible Ni Thothup

I SOMOL e ma ayweg e girdi’ nike t’uf e ayuw rorad

¹ Ke sorok SOMOL! Gimed e pi tapigpig rok SOMOL, mu pininged e sorok nga fithingan!

² Mang e yugun pining e sorok nga fithingan, e chiney i yan ngaram ndariy n’umngin nap’an.

³ Ngan pining e sorok nga fithingan SOMOL ni mus ko ngek nge mada’ ko ngal!

⁴ I SOMOL e be gagiyegnag urngin e pi nam; feni gilbugwan e ke pag e pi tharmiy ngalang.

⁵ Dariy be’ ni bod rogon SOMOL ni Got rodad. Ma par ko bin th’abi lang e giyow,

⁶ machane ma lumel nga but’ nge guy e pi tharmiy nge fayleng.

⁷ Me suwonnag e pi’in gafgow u fithik’ e ab; me chibiy e pi’in bt’uf e ayuw rorad u fithik’ e gafgow

⁸ me tayrad ngar manged fager ko pi’in pagel ni fak e pilung, fapi fak e pilung ko girdi’ rok.

⁹ I tolangnag be’ ni bpin ni dariy fak u lan e tabnaw rok, me felfelan’nag fare pin ko bitir ni pi’ ngak. Ke sorok SOMOL!