Psalms 111 - Bible Ni Thothup

Ngan pining e Sorok ngak SOMOL

¹ Ngan pining e Sorok ngak SOMOL! U polo’ i gumircha’eg e nggu pining e magaer riy ngak SOMOL u lan e mu’ulung ko girdi’ rok.

² Rib th’ab feni fel’ e tin ma rin’ SOMOL! Gubin e pi’in kar felfelan’gad ngay e yad ba’ adag ni ngar nanged fan.

³ Gubin e tin ma rin’ ma ba gil ma rib rir; ma feni mat’aw e dariy n’umngin nap’an.

⁴ I SOMOL e der ma pagdad ngad pagged tilin epi maang’ang nma rin’; ir e ba gol ma ba marnguy.

⁵ Ma pi’ e ggan ni fan ngak e pi’in yad ma liyor ngak; der ma pagtilin fare m’ag rok.

⁶ Ke dag gelngin ko girdi’ rok ko pi binaw ni tafen piyu bang nike pi’ ngorad.

⁷ Ba yul’yul’ mab mat’aw u fithik’ urngin e tin ma rin’; urngin e motochiyel rok ma ba pagan’uy ngay.

⁸ Ya ma par ni kargon ni gubin ngiyal’; nni pi’ u fithik’ e riyul’ nge mat’aw.

⁹ Got e ke pithig e girdi’ rok, ma ke ngongliy ba m’ag u thilrad ni manemus. Ir e ba thothup ma ba gel gelngin.

¹⁰ Dogwen SOMOL e ireram tabolngin e gonop; gubin e pi’in ma folwok rok e ra pi’ e tamilangan’ ngorad. Ir e ngan pining e sorok ngak ni dariy n’umngin nap’an.