Psalms 109 - Bible Ni Thothup

Gun’gun’ ni tay be’ u fithik’ e gafgow

¹ Got, gu be pining e sorok ngom; dab mu par ni kam th’abgulungam!

² Girdi’ ni kireb nge pi sasalap e yad be cham ngog. Yad be lifith e thin ni murung’ageg,

³ ma yad be yog e thin ni kireb ni murung’ageg, yad be cham ngog ndariy tapgin.

⁴ Yad be togopluw ngog, ni yug aram rogon ni yad bt’uf rog ni gu ma pi’ e meybil ni farad.

⁵ Yad be fulweg ngog e kireb ni taban e fel’ nge fananikan ni taban e t’ufeg.

⁶ Mu mel’eg boch e pi tapufthin nib kireb nge pufthinnag e to’ogor rog, ma ga pag reb e to’ogor rok nge yog thibngin.

⁷ Mang e yug ni pufthinnag nge m’ug nib kireb e rok; mang e yigi par ni mus ko meybil rok ma ba oloboch!

⁸ Mang e yigi pay nge math e fan rok; mang e yigi fek be’ luwan ko maruwel rok!

⁹ Mang e yigi par pifak ni kanim’ rorad, me par le’engin ni dakuriy figirngin!

¹⁰ Mang e yigi malethay pifak; mang e yi gun tulufrad ko gin ke mogoth ni yad ma par riy!

¹¹ Mang e fek e pi’in i tay e malfith ngorad urngin e tin bay rok, mang e yib e pi milekag ngar feked urngin e tin i muruwliy.

¹² Mang e yigi par ni dariy be’ nra gol ngak ara ayuweg pifak ko ngiyal’ nike yim’ rorad.

¹³ Mang e yigi math mit e pi’in owchen, mang e yigni pagtalin fithingan u lan e bin bayib e mfen.

¹⁴ Mang e yigi yib ngan’ SOMOL e kireb rok e pi ga’ rok kakrom, me pag ni dabi n’agfan e denen rok e chitiningin bi’id.

¹⁵ Mang e yigi par SOMOL ni bay u wan’ e pi denen rorad, machane mang e yugun pag tilrad!

¹⁶ Ya re mo’on nem e da i yib ngan’ ni nge gol’; I gafgownag ma be thang e pogofan rok e pi’in gafgow, nge pi’in bt’uf e ayuw rorad, nge pi’in ni dabyag ni ngar ayuwegedyad.

¹⁷ Ri ba’adag nma yibil ni nge buch wa’athan be’ — mang e yigi mang ir e buch wa’athan! Dabun ni nge fal’eg wa’athan be’, mang e yigi dariy be’ ni fal’eg wa’athan!

¹⁸ Ka ri macham ngak nma yibiley be’ nga kireb, ni bod e mun mad; mang e yigi rich e yibil rok ni kireb nga fithik’ i dow ni bod e ran nge nga fithik’ e yil rok ni bod e gapgep.

¹⁹ Mang e yugur upunguyed ni bod e mad me par u lukngun ni bod e leed ni gubin ngiyal’!

²⁰ SOMOL, mu gechignag e pi to’ogor rog ni aram rogon — pi’in yad ma yogneg nga dalib!

²¹ Machane gur SOMOL rog ni Th’abi Tolang, mu ayuwegneg ni bod ni kam micheg, ma ga chuwegeg u fithik’ ni bochan feni manigil e t’ufeg rom.

²² Gu ba gafgow ma bt’uf e ayuw rog; be amith fithik’ i lanin’ug.

²³ Bay gu m’ay ngabang ni bod e taglul’ ni gonowrug; ma ku gu un ko nifeng ni bod ba chachangeg.

²⁴ Ke m’ay gelngin bugug ni bochan e uyngol; kug par ni go’ bayach nge yil.

²⁵ Nap’an nra guyeg e girdi’ miyad minmin ngog; miyad chichingeg lolgerad u fithik’ e migrig.

²⁶ A SOMOL ni Got rog, mu ayuwegneg; ni bochan fare t’ufeg rom ni dabimus, mu ayuweg e pogofan rog!

²⁷ Mu gagiyegnag e pi to’ogor rog ngar nanged ni gur e cha’ ni ga be ayuwegneg.

²⁸ Go manga yad ra yibilayeg, machane ga ra fal’eg wa’athag. Mang e yigi waer e pi’in yad be gafgow nigeg, me mang gag ni tapigpig rom e gu felan’.

²⁹ Mang e yigi mathrow e pi to’ogor rog ko tamra’; mang e yug ro’ned e tamra’ nga dakenrad ni bod ba wuru’ e mad nib n’uw.

³⁰ Bay gu pining e magaer ngak SOMOL nib ga’ lamag; bay gu pining e sorok ngak u fithik’ e girdi’ nike mu’ulung,

³¹ ni bochan e Ir e ma n’ufeg e pi’in ke gafgow mma ayuweg e pogofan rorad u pa’ e pi’in kar turguyed e gechig rorad ni yam’.