Psalms 108 - Bible Ni Thothup

Ba meybil ngak Got ni nge ayuwegey u pa’ e pi to’ogor

¹ A Got, ka ri pagan’ug; Bay gu tang nggu pining e sorok ngom! Lanin’ug, mu od!

² Talin e musik rok ni harp nge lyre, mu odgow! Bay gu pug e yal’ nge od.

³ A SOMOL, bay gu pining e magaer ngom u fithik’ e pi nam. Bay gu pining e sorok ngom u fithik’ e pi girdi’.

⁴ T’ufeg rom ni dabimus e keded nga p’ebgul e pi tharmiy; ma fenam yul’yul’ e ke tun nga lanelang.

⁵ A Got, mu dag feni sorom u lanelang, nge fanam muluplup’ u ga’ngin e fayleng.

⁶ Mu ayweg e pogofan romad u gelngim; mu fulweg taban e meybil rog, ya nge dabi buch ban’en ko pi’in yad ba t’uf rom.

⁷ Par Got u tagil’ nib thothup me ga’ar, “Kug gel ere fare binaw nu Shekem e bay gu pag e f’oth ngay, mu gu f’oth fare loway nu Sukkoth rok e girdi’ rog.

⁸ Gilead e ba milfan ngog, ma ku errogon yu Manasseh; Efraim e urwach rog ma Judah e fare sog ko pilung ni fanag.

⁹ Machane bay gu tay yu Moab ni barba’ i dabiy ni yima maluknag eg riy, ma bay gon’ e sus rog nga daken yu Edom, ni pow riy nib milfan ngog. Bay gu tolul ni kug gel ngak e pi Filistine.”

¹⁰ A Got, i mini’ e ra fekeg ngalan fare binaw ni kan yororiy ni fan ko mael? Mini’ e bayi pow’iyeg nga Edom?

¹¹ Rriyul’ ni kam n’agmad? Mog, dab kum un ngak e salthaw romad ko mael?

¹² Mu ayuwegmad u pa’ e to’ogor romad; ya ayuw ko girdi’ e bm’ayfan.

¹³ Ra bay Got u ba’ rodad ma gadad ra gel; Ir e bayi gel ngak e pi to’ogor rodad.