Psalms 107 - Bible Ni Thothup

KAEN LAL E BABYOR ( Psalms 107—150 ) Sorok ni yibe pining nga feni manigil Got

¹ Mu pininged e magaer ngak SOMOL, ya ir e mmanigil; ma t’ufeg rok e bmanemus!

² Mu uned ngog i pining e sorok ngak SOMOL, ni gimed gubin e pi’in nike ayuwegmed u pa’ e to’ogor romed. I ir e ke lagmed u pa’ e pi to’ogor romed,

³ ke chuwegmed ko pi nam ni gathi nam romed, ke fulwegmed u lan e ngek nge ngal, ngu lan e lel’och nge yimuch.

⁴ Boch i gimed e uranod u daken e ted i yan ndariy e kanawo’ riy, ma dar pir’eged wo’rad ngalan reb e binaw ni ngar pired riy;

⁵ ra pired ni karm’ad ko bilig nge belel, ndakur fineyed ni ku yad ra fos.

⁶ Nap’an nra gafgowgad ni aram rogon miyad wenig ngak SOMOL, me ayuwegrad ko gafgow nike aw ngorad.

⁷ Ya pow’iyrad u ba kanawo’ nib k’iy, nga bbinaw ni ir e ngar pired riy.

⁸ Thingar ra pininged e magaer ngak SOMOL ni bochan e t’ufeg rok e dabimus, nge bochan e tin ni bfel’ nike rin’ ngorad!

⁹ Ma chuweg e belel rok e pi’in karm’ad ko belel, ma pi’in karm’ad ko bilig e ma pi’ ngorad e tin ni bfel’ ngar fosgad.

¹⁰ I par boch i yad u fithik’ e lumor u kalbus, ya kar pired ni yad e kalbus ni ka nin’ e chen ngorad yad be gafgow,

¹¹ ni bochan e ra togopluwgad ko tin ni yog Got ni Gubin ma Rayag Rok, ya ra dabuyed ni ngar folgad ko pi fanow rok.

¹² Ke aw porowrad ko maruwel nib gel; yad ra aw nga but’, ma dabi yan be’ i ayuwegrad.

¹³ Nap’an nra gafgowgad ni aram rogon miyad wenig ngak SOMOL, me ayuwegrad ko gafgow nike aw ngorad.

¹⁴ Ke chuwegrad u fithik’ e lumor u kalbus, me th’ab e chen ni ka ni m’ag ngorad.

¹⁵ Thingar ra pininged e magaer ngak SOMOL ni bochan e t’ufeg rok e dabimus, nge bochan e tin ni bfel’ nike rin’ ngorad.

¹⁶ Ma t’ar e mab nga but’ nni ngongliy ko wasey ni bronze, me t’ar nga but’ yuley i wasey.

¹⁷ Boch i yad e i m’ar ni bochan e denen ni ur ngongliyed, mu’ur gafgowgad ni bochan e kireb rorad;

¹⁸ ni chichingeg e ggan nga owcherad, me chugur ni nge math e pogofan rorad.

¹⁹ Nap’an nra gafgowgad ni aram rogon miyad wenig ngak SOMOL, me ayuwegrad ko gafgow nike aw ngorad.

²⁰ I non miyad gol, me lagrad ko riya’.

²¹ Thingar ra pininged e magaer ngak SOMOL ni bochan e t’ufeg rok e dabimus, nge bochan e tin ni bfel’ nike rin’ ngorad.

²² Thingar ra urfiyed e gamanman ngar pi’ed ngak ni maligach ni aram e yad be pining e magaer ngak, miyad tang u fithik’ e felfelan’ ngar weliyed urngin e tin ke rin’!

²³ Boch i yad e i chur u maday u barkow, ni yad be muruwliy e salpiy rorad u maday;

²⁴ ra guyed e tin ke rin’ SOMOL, ni pi ngongol rok ni bfel’ ni bay u maday.

²⁵ I non, me thow nifngin e yoko’, me sum e n’ew ni ba ga’.

²⁶ Mi i yan fapi barkow nga p’ebugul e n’ew ngi i chuplog nga but’; ni be chugur ni nge pil, ma pi pumo’on ni yad bay u daken fapi barkow e rrusgad;

²⁷ ur tuturpelgad ma yad be thigthig ni gowa kar balyanggad ko rrum; rogon farad salap ko maruwel u barkow e yan i aw nike m’ay fan.

²⁸ Nap’an nra gafgowgad ni aram rogon miyad wenig ngak SOMOL, me ayuwegrad ko gafgow nike aw ngorad.

²⁹ I mocha’nag e yoko’ me gapas e n’ew.

³⁰ Me felfelan’rad ya ke mocha’, me fekrad i yan ko gin yad be nameg nde buch ban’en rorad.

³¹ Thingar ra pininged e magaer ngak SOMOL ni bochan e t’ufeg rok e dabimus, nge bochan e tin ni bfel’ nike rin’ ngorad.

³² Thingar ra weliyed u lan e mu’ulung rogon feni sorok, miyad pining e sorok ngak u p’eowchen e mu’ulung rok e pi’in pi’lal ni yad ma yog e thin.

³³ I SOMOL e mliknag e yu pa’ i lul’, me taleg e pi alublub.

³⁴ I pingeg e but’ nib yong’ol nge buday ni daki fel’, ni bochan e kireb ni i ngongliy e pi’in i par u rom.

³⁵ I pilyeg e ted ni desert nge ngal’ ni lipath, nge but’ ni mlik nge yib e ran riy.

³⁶ I pag e girdi’ ni karm’ad ko bilig ngar pired u rom, ngar toyed bbinaw u rom ngar tafned.

³⁷ Ra woldug niged e yungi flang miyad yung e grape, ngar t’ared wom’ngin nrib yo’or.

³⁸ Ke fal’eg wa’athan e tirok e girdi’ ke yo’or pifakrad, me tay yu ran’ i garbaw ni fakrad nda i lich.

³⁹ Nap’an ni waer girdi’en Got ko mael ngar tamra’gad, ni bochan e gafgow nni gelnag ngorad ngar gafgowgad,

⁴⁰ me dag ngak e pi’in yad be gafgow nagrad ni dariy farad, me tayrad ngu’ur derawgad u daken e ted ndariy e kanawo’ riy.

⁴¹ Machane ayuweg e pi’in ke t’uf e ayuw rorad u fithik’ e gafgow rorad, me yo’ornag chon e tabinaw rorad ni bod yu ran’ i saf.

⁴² Pi’in yad mmat’aw e ra guyed ni aram rogon, me felan’rad, ma urngin e pi’in kireb e ra th’abed gulungrad.

⁴³ Pi’in yad ba gonop e mang e yugur leam niged e pin’ey; mang e yugur tafnay niged fare t’ufeg rok SOMOL ni dabimus.