Psalms 102 - Bible Ni Thothup

Ba meybil rok be’ ni kab pagel nike yib e gafgow ngak

¹ SOMOL, mu telim ko meybil rog, mu rung’ag lamag ni gu be yornag e ayuw!

² Nap’an nra yib e oloboch ngog, ma dab mu pi’ keru’um ngog! Mu telim ngog, ngiyal’ ni gu ra piningem ma ga fulweg lungug nib papey!

³ Yafos rog e be m’ay ngabang ni bod e ath; ma be mo’oruf dowag ni bod ba nifiy.

⁴ Kug parde’ nga but’ ni bod e pan nike mroroy; kug fangan’ ko ggan.

⁵ Gu be gel’gel’ ngalang; Kug par ni go’ gub thum i yil nge biyach.

⁶ Gu bod ba arche’ ni malboch u lan e ted ni desert, bod ba arche’ ni owl u bang ni kann’ag nike mogothgoth.

⁷ Der mol owcheg; gu bod ba arche’ ni go’ ir u daken e chigiy ko naun.

⁸ Polo e rran ni be yog e pi to’ogor rog e thin nib kireb ngog; kar ted fithingag ni kemang ba yaba’.

^9-10 Bochan e damumuw nge gelngin e puwan’ rom, ma aram e awat e kemang ggan rog, ma lu’ag e ke ma’thuk nga fithik’ e garbad rog. Ya ka mu chibiyeg ngalang kamun’eg nga orel.

¹¹ Yafos rog e bod e taglul’ ni ganowrug; Gu bod e pan nike mroroy.

¹² Machane gur, SOMOL, e pilung ndariy n’umngin nap’an; gubin e mfen ni bay um par u wan’rad.

¹³ Bay mu sak’iy nge kireban’um ngak yu Zion; ke taw nga nap’an ni ngan runguy; irera’ ngal’an nike taw ngay.

¹⁴ Pi tapigpig rom e ba t’uf yu Zion rorad, ni yug aram rogon nike mogothgoth; ke kireban’rad ngak, ni yug aram rogon nike puth.

¹⁵ Bayi rus e pi nam ngak SOMOL; gubin e pilung nu fayleng e bay rrusgad nga gelngin.

¹⁶ Nap’an nra ubung SOMOL yu Zion bayay, me dag feni gilbugwan.

¹⁷ Bayi rung’ag laman e girdi’ rok nike n’agrad me motoyil ko meybil rorad.

¹⁸ Mu yoloyed nga but’ nge nang e bin bayib e mfen e n’en ke rin’ SOMOL, ya nge tin e girdi’ ni dawor ni gargalegrad e chiney ma bay ra pining e sorok ngak.

¹⁹ Me changar SOMOL nga but’ u tagil’ nib tolang ma ba thothup, i changar u tharmiy nga but’ ko fayleng.

²⁰ I rung’ag e gel’gel’ rok e pi kalbus, me chuweg u kalbus e pi’in kan turguy ni ngarm’ad.

²¹ Ma aram e fithngan e bay un weliy u Zion, ma bay ni pining e sorok ngak u Jerusalem

²² ko ngiyal’ ni nge yib e pi nam nge pi lung nga ta’bang ni ngar liyorgad ngak SOMOL.

²³ I SOMOL e ke me’waer nigeg ni kugub bitir; ke ngochnag e yafos rog.

²⁴ A Got, dab mu fekeg e chiney ni dawor gu pilbithir. A SOMOL, gur ga ma par ni dariy n’umngin nap’am;

²⁵ Kakrom ma ga sunmiy e fayleng, ma pi tharmiy e mu ngongliy nga pa’am.

²⁶ Pin’ey e bayi m’ay, machane gur e bay mu par; gubin ni bayi wod ni bod e mad. Bay mu n’agrad ni bod e mad, ma bay ra m’aygad ngabang.

²⁷ Machane, gur e gubin ngiyal’ ni kargom, ma yafos rom e dariy tungun.

²⁸ Pifakmad e bay ur pired ni dariy ban’en nra buch rorad, u tan pa’am ma pi’in owcharad e dabi buch ban’en rorad.