Psalms 101 - Bible Ni Thothup

N’en ni micheg ba pilung

¹ Tang rog e murung’agen e yul’yul’ nge mat’aw, A SOMOL, gu be yin’ e re tangney ngom.

² Bayi fel’ pangig. Are wi’in e ga ra yib ngog? Bay gu par ni gu ba machalbog u nu’an rog

³ ma dariy bi’id nrayag ni gu kadan’ug ko n’en nib kireb. Gu ba fananikay e ngongol rok e pi’in kar pi’ed keru’rad ngak Got; dab gu’un ngorad ko n’en ni yad be rin’.

⁴ Dab gu sasalap ma dab gu’un ko tin kireb.

⁵ Bay gu n’ag e en nma gungun’nag be’ nga dalib, Dabi k’adan’ug rok be’ nib tolngan’ ma ba ufanthin.

⁶ Bayi fel’ u wun’ug e pi’in yad ba yul’yul’ ngak Got ma bay gu pagrad ngar pired rog u tafen e pilung. Pi’in nri yad ba yul’yul’ e ni pagrad ngar pigpiggad ngog.

⁷ Dariy ba sasalap l’ugun nra par u naun rog; dariy be’ nma dake modingnag ir nra par u p’eowcheg.

⁸ Gubin e rran ni bay gu thirif u but’ e pi’in kireb u daken e but’ rodad; bay gu thurbeg urngin e pi’in kireb e leam rorad ngar chuwgad ko fare binaw rok SOMOL.