Proverbs 9 - Bible Ni Thothup

Gonop nge manan’

¹ Gonop e toy e naun rok ni medlip e rumog riy.

² I yog ngan li ba gamanman ni fan ko mur, me aruy e spice ko wayin, me ngongliy rogon e tebel.

³ Me l’oeg e ppin ni tapigpig rok ngranod ko gin th’abi tolang u lan fachi binaw ngar ponggad:

⁴ “Mired e ngaray, e girdi’ ni gelan’!” Me ga’ar ko en ni balyang,

⁵ “Moy, ngam koy e ggan rog ma ga unum e wayin ni ku gu aruy.

⁶ Mu chuw u fithik’ e pi girdi’ nir ni gelan’, ma ga par ni dab mum’. Mu lek kanawo’en e llowan’.”

⁷ Fa’an ga ra yal’uweg be’ nib ufanthin’, ma kemus ni gur e ra kireban’um ngom. Fa’an ga ra puwan’ ngak be’ nib kireb e leam rok, me gur e ga ra maad’ad.

⁸ Dariy e ngiyal’ ni ngam yal’uweg be’ nib ufanthin; ya ra fananikayem riy. Machane fa’an ga ra yal’uweg be’ nib gonop, ma ra adag dakenam.

⁹ Demturug e n’en ni ga ra yog ngak be’ nib gonop ma ra gel boch e gonop rok. Ma demturug e n’en ni ga ra yog ngak be’ nib mat’aw ma ra puthuy ko tin manang.

¹⁰ Ra ngam gonop ma som’on e thangri yib madgun SOMOL u lanin’um. Fa’anra gamnang Fa’anem nib Thothup, ma aram e ba tamilang lanin’um.

¹¹ Gonop e ra puthuy boch e duw ko yafos rom.

¹² Fa’anra bay e gonop rom me gur e ra yib e fel’ riy ngom, ma fa’an ga ra siyeg me gur e ga ra gafgow.

¹³ Pinat e bod be’ ni bpin ni mada’ laman ngalang ni dariy ban’en ni manang ni der tamra’.

¹⁴ Ma par u taga’ mab ko naun rok fa daken e chiya’ ko gin th’abi tolang ko binaw,

¹⁵ ngi i tolul ko girdi’ ni be yan ni tirorad e yad be nameg ni be ga’ar:

¹⁶ “Mired e ngaray, gimed e girdi’ nib manan’!” Me ga’ar ngak be’ nib balyang’,

¹⁷ “Rib athibthib e ran ni ka ni iring. Rib fel’ lamean e flowa ni ka ni iring.”

¹⁸ K’on fare pin nib pinat e darir nanged ni girdi’ ni yad mayan ko naun rok e yad ma yim’, ni pi’in ka ra thapgad ngaram e yad bay e chiney u ar u lan e fayleng ko yam’.