Proverbs 6 - Bible Ni Thothup

Ku boch ni ngan kol’ayuw riy

¹ Fakag, mog kammicheg ni nge milfan e malfith rok be’ ngom?

² Gur kamman mu aw ko thin rom, kam aw ko wup ko tinim micheg?

³ Ere, fakag, ka mu par nga tan gelngin fa’nem, machane ba’aray rogon ni ngam mul riy: mu gur nigem ngak, ngam wenig ngak ni nge pagem.

⁴ Dab mu pagem ngam mmol fa mu tal ngam toffan.

⁵ Mu chuw u lan fare wup ni bod ba arche’ fa ba gamanman ni deer ni be mil rok ba tamun gamanman.

⁶ Girdi’ ni gamead e thingar ra filed ban’en u rogon nma par e apurgog.

⁷ Dariy be’ ni be yog e thin rorad fa ir e pilung rorad, fa be gagiyeg nagrad,

⁸ machane ra taw ko ngiyal’ ni bay e gowel ma yad ma kunuy e ggan ngar cha’ariyed ni ngar ked ko ngiyal’ nike yib e garbeb.

⁹ Uw n’umngin nap’an ni ngi i mol e en nib gamead? Mingiyal’ e nge suwon?

¹⁰ Be ga’ar, “Nga yug gu fek bochiyang riy; nga yug gu uchumiy pa’ag nruw raba’ nggu mol bochu’uw.”

¹¹ Machane ra ka be mol me yib i og e gafgow ngak ni bod ba moro’ro’ ni bay talin e cham rok ni og ngak be’.

¹² Girdi’ ni kireb nib ma’fan e go’ sasalap l’ugun e yad be tay i yan.

¹³ Yad be t’ar owcharad ma yad be fanathin nga pa’rad ni ngar ban niged gur,

¹⁴ ma aram n’umngin nap’an ni yad be tanomnag e kireb u lanin’rad nib pig nga bang, miyad be k’ar oloboch u gubin yang.

¹⁵ Bochan e ran’ey, ma bayi aw e riya’ ngorad nib tomgin, ngar maad’adgad nib gel.

^16-19 Medlip ban’en ni bay ndabun SOMOL ni dabyag ni nge k’adan’ riy: changar ni ufanthin, ba yunmon nma lifith e thin, pa’ef nma thang e pogofan rok e girdi’ ndawor ra bucheged ban’en, ba leam nma tanomnag e kireb, rifrifen ay nma gur ni nge yan i ngongliy e kireb, be’ ni ir e mich u ban’en ni go’ malfith e i weliy, nge be’ nma k’aring e oloboch nga thilin e pi tafager.

Ngan yul’yul’ ngak le’engiy

²⁰ Fakag, mu rin’ e n’en ni be yog e chitamam ngom, ma dariy bi’id ni ngam pagtalin e n’en nike fil e chitinam ngom.

²¹ Mu cha’riy e thin rorow ni gubin ngiyal’, mu michigiy u lan gum’ircha’em.

²² Machib rorow e ri i pow’iyem u nap’an ni ga be milekag, ngi i yororiyem nnep’, me fanow nigem ni rran.

²³ Pi fonow rorow e ba magal ni be mat’; chep ni yow be tay ngom e rayag ni nge fil ngom rogon e par.

²⁴ Rayag ni nge tem u orel ko ppin ni kireb, nge pi thin ni darngal rok yug boch e ppin ni yad mmabgol.

²⁵ Dabi unan’um ko pidorang rorad; dab mmul ni bochan e dawol u owcharad ngom.

²⁶ Be’ nib mo’on e rayag ni nge chuwi’iy reb e bpin nma chuway’ ngak ni bod puluwon ba flowa ni loaf, machane par ni yow ra tay be’ ni gathi mabgol rok e ra thay u pa’ gubin e tin bay rok.

²⁷ Gur, rayag ni mu fek e nifiy u daken ngarngorem ni dabi mo’oruf e mad rom?

²⁸ Gur, rayag ni mman u daken e kol nib gowel ni dabi urfiy rifrifen em?

²⁹ Ri aram feni ga’ riya’en ni ngam pirew le’engin be’. Cha’ nra rin’ e ra gafgow.

³⁰ Girdi’ e darir dabuyed ba moro’ro’ ni k’iy me iring e ggan;

³¹ ma fa’an nni kol, ma thangri pi’ puluwon ni medlip yay — thangri pi’ gubin ban’en ni bay u pa’.

³² Machane re mo’on nra pirew be’ ni gathi mabgol rok e ba manan’. Ya ir e be gafgownag ir.

³³ Bay i ma’fan ma yibe li’; ma bayi par ni dakriy rogon ngabang.

³⁴ Be’ nib mo’on nib mabgol e dariy ba damumuw nra tay ni bod gelngin e ngiyal’ nike talyeg; falbiyen nra tay riy e dariy folen.

³⁵ Dabi fanay reb e bayul; ma dariy urngin e tow’ath nra gapaseg e damumuw rok.