Proverbs 25 - Bible Ni Thothup

Ku boch e thin ni Gonop rok Solomon

¹ Ku ba’aray boch e thin rok Solomon ni bay e gonop riy, ni yoloy boch e tolang u tafen e puf oloboch rok Hezekiah ni Pilung nu Judah.

² Gadad ma yog e sorok ngak Got ko tin ke tay nib mith; ma gadad ma yog e sorok ngak e pilung ko tin ni yad be tamilangeg i weliy murung’agen.

³ Dabyag ni ngam nang e n’en nma tafinaynag ba pilung; ya leam rok e dabi taw e leam rodad ngay, bod feni tolang lanelang ara feni to’ar lan e regur.

⁴ Ra nchuweg e tin ba alit u fithik’ e silber ma en nib salap ko dumow ban’en e rayag ni nge fal’eg ban’en ni bfel’ ya’an riy.

⁵ Mu tay e pi tafanow ni kireb e leam rorad u orel rok fare pilung ma birok’ e am e go’ yira nang nib mat’aw.

⁶ Nap’an ni ga ra sak’iy nga p’eowchen fare pilung, ma dab mu guy rogon ni ngam fel’ u owchen nga mu dake gur be’ nib sorom.

⁷ Kabfel’ ni nganog ni ngam man nga reb e liw nib tolang ko bin nganog ngom ni ngan pi’ e birom e liw ngak be’ ni kab sorok boch ngom.

⁸ Yug dab mu gur nagem nga tafen e puf oloboch u murung’agen ban’en ni ka mu guy. Ya fa’anra ta’boch me micheg be’ ni gur e ga ba oloboch, me’ere mang e ngam rin’?

⁹ Fa’anra gur nge en gimew buguliyoror e der ta’reb lungmew, ma nge mang gimew e mu pithigew u thilmew, ma dab mu pugew murung’agen e tin nib mith ngalang.

¹⁰ Ya ra dangay mra nang e girdi’ ndariy ban’en nra mith u puluwom, ma ga par ni dabki chuw tamar’en u dakenam.

¹¹ Ba tafinay nni weliy ni bfel’ rogon nge tamilangan’uy riy e bod rogon e gol ni ka ni ngongliy ni bfel’ ya’an ka ni ayliy nga daken e silber.

¹² Ba fnow ni tay be’ ni manang e n’en ni be yog ngak be’ nib m’agan’ ni nge motoyil, e ka baga’ fan ko luwaw ni gol, ara nunuw nni ngongliy ko gol nib th’abi fel’.

¹³ Ba tamal’og nib pagan’uy ngak e rib fel’ u wan’ e en ma l’oeg, ni bod e ran ni garbeb ko ngiyal’ nib gowel ni yibe kunuy wom’ngin e woldug.

¹⁴ Girdi’ ni micheg bogi ban’en ni bay ra pi’ed me taw ngay ma dab ra pi’ed e yad bod yungi manileng nge nifeng nder pi’ e n’uw.

¹⁵ Guman’ nge thin nib simunguy e rayag ni nge t’ar lanyan’ be’ ni der pag lanyan’, ma ku rayag ni nge thilyeg lanyan’ e pi tayugang.

¹⁶ Dab mu koy e honey nge pag oren; yug ra yo’or ma rayag ni ngam sul’ugun.

¹⁷ Yug dab um sul ngak e en ni gimew bbuguliyoror; ya rayag ni nge chalban ngom me dabuyem.

¹⁸ Dum’thin nga daken be’ e ri ba ubchiya’ ni bod ba saydon ni talin e maad’ad, fa baley i gul, fa ba gan e gat’ing nib m’uth.

¹⁹ Gif ngak be’ ni dabiyag i toer ngak u fithik’ e gafgow nike achngiy, e bod ni ngan yengyeng ban’en ngab nguwol nike thekthek, ara ni mod ngab rifrif nib yaf.

²⁰ Yira tangnag be’ nike gafgow lanyan’ ma bod e mad nluf u daken be’ borran ni ba gel e garbeb ara sol nthiy u mit bang u dowey nike maad’ad.

²¹ Mu durwi’iy e to’ogor rom e ngiyal’ nike yib e bilig ngak; ma ga pi’ e garbod ngak ko ngiyal’ nike balel.

²² Ya aram e ra yim’ ko tamra’, ma SOMOL e bay labgen nra pi’ ngom.

²³ Nonnon e ma k’aring e damumuw nri bod e nifeng u yimuch nma fek e n’uw i yib.

²⁴ Kabfel ni ngam par u daken e chigiy ko bin ngam pirew le’engim nib me’eryag u ta’ab naun.

²⁵ Thin ni bfel’ nike yib u bang nib palog e yira rung’ag ma bod e ran nib garbeb ni ngan unum ko ngiyal’ nike malik k’angay ni kanim’ ko balel.

²⁶ Be’ nib manigil ni m’ing ngak be’ nib buchan’ e bod’ ba alublub nike aer aer ara ba luwed nike burow e ran riy.

²⁷ De fel’ ngom e honey ni yug ba yo’or, dab mu guy rogon ni ngu u nog e sorok ngom.

²⁸ Fa’anra dabiyag ni ngam kadan’um ko domumuw rom, ma ri ga bod feni me’waer bbinaw ni dariy e rungrung riy, nib puf wo’en e cham ngay.