Levitikus 21 - Bible Ni Thothup

Feni tabgul fapi prist

¹ I yog SOMOL ngak Moses ni nge ga’ar ko fapi prist ni pifak Aron, “Dariy reb e prist ni nge ta’aynag ir u reb e gam’ing ko yam’ u nnap’an nra yim’ be’ ni pibe’ rok,

² rayag ni nge un ni fa’anra chitiningin ara chitamngin, fa be’ nib mo’on ara be’ ni bpin ni fak, fa be’ nib mo’on ni walagen,

³ fa be’ ni bpin ni walagen ndawori mabgol ni kama par u tabnaw rok fare prist.

⁴ Dabi ta’aynag ir ni bochan ba yam’ ni girdi’en le’engin.

⁵ “Dariy ba prist nra midro’nag bang u lolgen fa th’ab bang u roben ara th’ab yu yang u downgin ni nge dag ni be mowaw.

⁶ Thingari par nib tabgul ma thangri dabi m’anag fan fithingag. Ma pi’ e maligach ni ggan ngog, e re thangri par nib tabgul.

⁷ Be’ nib prist e dabi le’engiy be’ ni bpin ni ki’i pi’ ir nchuway’, fa be’ ni bpin nike nang e pumo’on, fa be’ ni bpin nike chuw ko mabgol rok; ya fare prist e ba tabgul.

⁸ Girdi’ e thingar ted fare prist nib tabgul, ni bochane ma pi’ e maligach ni ggan ngog. I gag SOMOL; I Gag e gu ba thothup ma gu ma thothupnag e girdi’ rog.

⁹ Ma fa’anra be’ ni bpin ni fak e prist ni pi’ ir nchuway’, ma aram e ke dariy fannag e chitamngin; ma yira urfiy nge yim’.

¹⁰ “Fare Prist ni Th’abi Ga’ e kan pu’og fare gapgep ni fen e mathiy ni nge tabgul nigey nga daken lolgen ni kan tabgulnag ni nge chuw ko fapi madan e prist, thangri dabi pag piyen lolgen ndabi rawey ara guchthiy e mad rok ni nge dag ni ir be’ ni be mowaw.

^11-12 Kan ognag ngog ere dabi ta’aynag ir, ara ta’aynag e Tent rog nib thothup ni nge chuw riy nge yan nga langgin reb e naun ni bay ba yam’ riy, ni demturug ko chitamngin fa chitiningin.

¹³ Ma thangri le’engiy be’ ni bpin ndawori nang e pumo’on,

¹⁴ ma gathi be’ ni bpin nike yim’ figirngin fa be’ ni bpin nike chuw ko pumo’on rok ara be’ ni bpin ni i pi’ ir ni chuway’. Thangri le’engiy be’ ni bpin ni dawri nang e pumo’on ni yow nga ta’ab ke girdi’.

¹⁵ Ya ra danga’ ma pifak ndabisiy ni ngar pired ni yad ba tabgul e yad ra ta’ay. I Gag SOMOL e kug fael nga bang ni nge mang fare Prist ni Th’abi Ga’.”

¹⁶ Me yog SOMOL ngak Moses

¹⁷ ni nge ga’ar ngak Aron, “Dariy reb e pi’in owchem ni bay bang u downgin nib kireb nra pi’ fare maligach ni ggan ngog. Aray rogon ni ngu’un rin’ i yan ngaram.

¹⁸ Dariy be’ nib mo’on ni bay bochiyang u downgin nib kireb nrayag ni pi’ e maligach: ni en nib malmit, fa ba mugutgut, fa ba kireb bang u dow, fa bay bang u dow nde sum;

¹⁹ fa be’ nib mugutgut rifrifen pa’ ara rifrifen ay;

²⁰ fa be’ nib bugbug keru’, fa be’ nrib pag feni ngochngoch; fa be’ nib kireb barba’ i owchen ara bay e m’ar ko dowef rok; ara reb e eunuch.

²¹ Dariy reb e pi’in owchen Aron ni prist ni bay bang u dow nib kireb nrayag ni nge pi’ fare maligach ni ggan ngog.

²² Be’ nib mo’on ni aray rogon e rayag ni kay fare ggan ni kan pi’ ngog, ni fa bin kan ognag nib thothup nge fa bin kan ognag nib th’abi thothup,

²³ ma bochan ni bay bang u downgin nib kireb, ma dabi yib nga to’oben fare gi kateng nib thothup ara chuchugur ko fare altar. Thangri dabi ta’aynag e pin’ey nib thothup, ni bochan e Gag SOMOL e kug thothupnag.”

²⁴ Irera’ e pin’en ni yog Moses ngak Aron, nge pifak Aron, nge ngak urngin e pi girdi’ nu Israel.