Jonah 2 - Bible Ni Thothup

Meybil rok Jonah

¹ Me meybil Jonah ngak SOMOL ni Got rok u rom u lan yin fare nig ni ga’ar:

² “U fithik’ e buchbuchan’ rog, a SOMOL, mu gu piningem ma ga fulweg lungug. U ar u lan e fayleng ko yam’ e gu yornag e ayuw, ma ga rung’ag lungug.

³ Mon’eg nggu wan nga’ar, nga t’ay e regur, nge tharayeg e day, ma pi n’ew rom nib gel e lobeb u dakenag.

⁴ Ma aram mug ga’ar, “Kan tharbageg u p’eowchem; gur ku ra gguy bayay e Tempel rom nib thothup?

⁵ I yib e day nge tharayeg nggu l’ad ngay; nggu ligil nga’ar, me ing e lem nu maday chugeg.

⁶ Gu wan nga’ar nggu mada’ nga enggin fapi burey; ngalan fa re binaw ni yug ma par e garog riy nib man’ ndariy n’umngin nap’an; machane gur SOMOL ni Got rog e kam fulwegneg u ar nda gum’!

⁷ Nap’an ni gu thamiy rog ni nggum’, ma aram mu gu meybil ngom SOMOL, ma ga rung’ag lamag ngalan e Tempel rom nib thothup.

⁸ Pi’in yad be toer ngak fapi liyos ndabiyag ni ngar ayuwegned be’ e kar paged gur ni dakurir yul’yul’gad ngom.

⁹ Machane bay gu tang nigem ni gu be pining e sorok ngom; ma bay gu li’ ba gamanman nggu pi’ ngom ni maligach, tin ni kug weliy ngom e bay gu rin’. I SOMOL e ma yib e ayuw rok!”

¹⁰ Me non SOMOL ngak fare nig, me yib fare nig i thuwag Jonah nga dap’el’ay.