Jeremiah 47 - Bible Ni Thothup

Thin ni yog SOMOL u murung’agen yu Filistia

¹ U m’on ni nge cham fare pilung nu Egypt ko yochi binaw nu Gaza, me yog SOMOL ngog ni ngugog ngak piyu Filistia:

² I ga’ar: “Mu changargad! Ke puw ngalang u lane lel’och nib machrag ni bayi sugbur ni bod e lul’. Bayi tharay e binaw nge gubin ban’en u daken, nge pi binaw nge girdi’ nma par riy. Girdi’ e bay ra tolul niged e ayuw; me yor nib gel gubin e girdi’ u daken e fayleng.

³ Bay ra rung’agned lingan ay e os, nge lingan e chariot, nge lingan e tiyapyap riy. Gallabthir e bay dab kur sulod ngak pifakrad; ma bayi ul pa’rad nga but’.

⁴ Ke taw ko ngiyal’ ni nge mogothgoth yu Filistia, min thirifrad ngar chuwgad u Tyre ngu Sidon ni dariy bagyad nra magay ni ngki pi’ e ayuw. I Gag SOMOL, e bay gu thang owchen piyu Filistia ni aram gubin e pi’in rabad u dap’el’ay u Krete.

⁵ Gafgow ni ga’ e keyib nga daken e girdi’ nu Gaza, ma girdi’ nu Ashkelon e ka ra th’abed gulungrad. Uw n’umngin nap’an ni nge par yu Filistia ni be mowaw?

⁶ Mu yorgad ngalang ni gimed be ga’ar, ‘Saydon rok SOMOL! Uw n’umngin nap’an ni ngam dumow? Mu sul ngalan tafen e saydon, mu par u rom ngam toffan!’

⁷ Machane uw rogon ni nge toffan, ni ku gu mu’ i pi’ e maruwel rok ni nge rin’? Kug motochiyel ngak ni nge cham nga Ashkelon nge girdi’ nma par u dap’el’ay.”