Jeremiah 37 - Bible Ni Thothup

Zedekiah ni man ayuw ngak Jeremiah

¹ Nebukadnezzar ni Pilung nu Babylon e tay Zedekiah nib mo’on ni fak Josiah, ni nge mang pilung ko nam nu Judah ni nge yan nga luwan Jehoyakin nib mo’on ni fak Jehoyakim.

² Machane Zedekiah, nge pi tolang ni yad bay u tan pa’, nge girdi’ e dar folgad ko fapi thin ni pi’ SOMOL ngog.

³ Zedekiah ni Pilung e l’oeg Jehukal nib mo’on ni fak Shelemiah, nge Zefaniah ni prist nib mo’on ni fak Maaseyah nga rognew ngog ni nggu meybil ngak SOMOL ni Got romad ni pa’ e nam romad.

⁴ Ma ngiyal’nem ma dawor ni teg nga kalbus ma kug be yan u fithik’ e girdi’ ni kab puf mat’wug.

⁵ Ma ngiyal’nem e ke yib e salthaw rok Farao nga wuru’ yu Egypt, ma yu Babylon ni yad be mael ngak yu Jerusalem e fa’an rrung’aged murung’agrad, miyad sul nga tomur.

⁶ Ma aram me yog SOMOL, ni Got nu Israel, ngog ni ngug ga’ar,

⁷ ngak Zedekiah, “Fa raba’ i salthaw nu Egypt e karbad ni ngar ayuweged gur, machane bay ra sulod nga taferad.

⁸ Ma aram e bayi sul piyu Babylon ngar chamgad ko re binaw ney ngar koled, miyad urfiy nga but’.

⁹ I Gag SOMOL e gu be puguran ngomed ni nge dab mu ban niged gimed ngu’um leam niged ndabki sul yu Babylon, ya yad ra sul

¹⁰ ni mus ni gimed ra li’ urngin e salthaw nu Babylon ni be cham ngomed e chiney nge yan i par ni kemus ni tin ke magey e girdi’ e ke maad’ad ni yad ba thig u lan e pi tent rorad, ma pi girdi’ nem e ku yad ra sak’iy ngarbad ra urfiyed e re binaw ney.”

Jeremiah nni kol nga ni kalbusnag

¹¹ Me mal’af e salthaw nu Babylon u Jerusalem ni aram e yad be sul nga tomur, ya be yib e salthaw rok Farao.

¹² Ma aram mu gu chuw u Jerusalem nggu wan ko gin tafen piyu Benjamin nggu fek e birog e f’oth ko binaw ni tafen e tabnaw rog.

¹³ Ma fa’an gu taw ko fare garog ni Benjamin fithingan, ma bay ba pilungen e salthaw u rom nib mil fan ngak e salthaw ni be maruwel u rom, ni be’ nib mo’on ni Irijah fithingan, ni fak Shelemiah, ni Hananiah e tutuw rok, me talegeg me ga’ar ngog, “Kam finey ni ngam mil ngam man ngak e girdi’ nu Babylon!”

¹⁴ Mu gu fulweg nug ga’ar, “Gathi er rogon! Gathi nggu mil!” Machane de motoyil Irijah ko n’en ni gu be yog. Me koleg nge fekeg i yan ngak e pi’in ntolang.

¹⁵ Miyad damumuw ngog miyad pi’eg ngan toyeg min teg ngalan e naun rok Jonathan ni ir e tayol u kort ngan man’nag e naun ngog, ma naun rok e ke mang ba kalbus.

¹⁶ Min teg ngalan ba kalbus ni bay u tan e but’, mu gu par u rom nib n’uw nap’an.

¹⁷ Me bingyal’ me yog Zedekiah ni Pilung ni ngan fekeg i yan ngak, me fith ngog u rom u tafen ni go’ gamow ni ga’ar, “Mog, bay bbugithin nike yib rok SOMOL?” Mu gu fulweg nug ga’ar, “Ba’, I gur e bay ni pi’em nga pa’ e pilung nu Babylon.”

¹⁸ Ma aram mu gu fith nug ga’ar, “Be mang oloboch e kug ngongliy nib togopluw ngom, ara pi tolang ko salthaw rom, ara pi girdi’ ney ni er tapgin ni kam teg nga kalbus?

¹⁹ Mang e ke rin’ fapi profet rom ni fa’ani lungurad ngom e pilung nu Babylon e dabi cham ngom ara re nam ney?

²⁰ Gu be wenig ngom e chiney ni ngam motoyil ngog ngam rin’ e tin nggu wenignag ngom. Wenig ngom, dab kum sulwegeg nga kalbus ko fare naun rok Jonathan. Ma fa’an ga ra fulwegeg, ma rib mich ni bay gum’ u rom.”

²¹ Me yog Zedekiah ni Pilung ni nga ni loknag e garog ngog u lan e yoror u tafen e pilung, ra reb e rran ma ba yael’ e flowa ni ka ni pi’ ngog ni kan fek u tafen e lum flowa, nge mada’ ko ngiyal’ nike m’ay urngin e flowa u lan fare binaw.