Isaiah 54 - Bible Ni Thothup

SOMOL nib t’uf yu Israel rok

¹ Jerusalem um par ni bod be’ ni bpin ndariy e bitir rok. Machane chiney e rayag ni ngam tang ma ga be garusnag e felfelan’. Ya chiney e bayi yag e bitir ngom nib pire’ boch ngak be’ ni bpin ni der chuw figirngin u charen!

² Mu ga’nag e tent ni ga be par u langgin! Mu n’uwnag gafan ma ga gelnag richiben u but’!

³ Bay mu ga’nag e mathil rom u gubin yang; girdi’ rom e bay ra sulweged fare but’ ni girdi’ nu yug boch e nam e be par riy. Pi binaw ni kann’ag e chiney e bayi sug ko girdi’.

⁴ Dab mu rus, ya dab kun darifan nigem bayay; dab kun tamra’ nigem. Bay mu pag talin e yul’yul’ ni da um tay ngak e pumo’on rom ko ngiyal’ ni kagab rugod, ma ku er i tay e kireban’ rom nib gel ko ngiyal’ ni yim’ figirngim.

⁵ En ni sunumiyem e bayi bod be’ ni figirngim, fithingan e SOMOL ni Gubin ma Rayag Rok! Fare Got nib thothup nu Israel e bayi biyuliyem, ir e be gagiyegnag ga’ngin e fayleng!

⁶ Israel, ga bod ba rugod nike mabgol, ma kari kireban’ ya ke cheal figirngin ke n’ag. Machane SOMOL e ke piningem ni ngam sul ngak ma be ga’ar:

⁷ “Kug pagem u lan ba talab, bay gu fulwegem ngog ya ri gab t’uf rog.

⁸ Gu pi’ keru’ug ngom u fithik’ e damumuw rog u lan ba talab; machane bay mu par ni gab t’uf rog ndariy n’umngin nap’an.” SOMOL nike biyuliyem e ara’ rogon nike yog.

⁹ “Nap’an Noah mu gu micheg ndab kug tharey e fayleng ko ran. Ma chiney e kug micheg ngom ndab kug damumuw ngom bayay; dab kug puwan’ ngom ara ggechig nigem.

¹⁰ Pi burey nge yungi ted e rayag ni nge puth, machane rogon nri gab t’uf rog e dariy e rofen nra mus; m’ag ko gapas ni kug micheg ngom e bay i par u gil’ ndariy n’umngin nap’an.” Irera’ rogon nike yog SOMOL ni ri gab t’uf rok.

Bin nib be’ech e Jerusalem

¹¹ Be ga’ar SOMOL, “Jerusalem, kam gafgow, gab binaw ndabiyag ni ngam ayuwegnem, ma dariy be’ ni nge fal’eg lanin’um. Bay gu ubung e pi deaf rom bayay ni malang nrib tolang paluwon e bay gu fanay ngay.

¹² Bay gu ubung epi tafen e damit rom, ni malang ni rubi e nggu fanay ngay, ma pi garog rom e bay gu fanay e malang ngay ni be gal ram’en ni bod e nifiy, ma yoror rom e bay gu fanay e malang ngay nrib t’uf ma ba tolang puluwon!

¹³ “I gag e bay gu machibnag e girdi’ rom, mu gu pi’ e fel’ rogon nge gapas ngorad.

¹⁴ Ngongol nib yal’uw ma bmat’aw e bayi gel nigem; ma dakuriy e gafgow nge marus ni nge yib ngom.

¹⁵ Ra cham be’ ngom ma gathigag e gu pi’ nge yib; ma en nra cham ngom e yira thirif u but’!

¹⁶ “I gag e gu sunumiy e girdi’ nma maruwel ko wasey, ni yad ma k’oreg e nifiy ngar ngongliyed talin e cham. Ku gag e gu sunumiy e salthaw ni yad ma maruwel nga talin e cham ngar thanged e pogofan.

¹⁷ Machane dariy ba talin e cham nrayag ni nge maad’ad ngom; bay u fulweg rom ngak urngin e pi’in yad ra yog ni gab kireb. Bay gu ayuweg e pi tapigpig rog, mu gu gagiyeg nagrad ngar gelgad.” I SOMOL e keyog e pi thin ney.