Isaiah 52 - Bible Ni Thothup

Got e bayi chuweg yu Jerusalem u pa’ e to’ogor rok

¹ Jerusalem, mu gel me gilbuguwam bayay! Binaw rok Got ni gab thothup, mon’ nga dakenam e mad rom nib gamog! Pi’in gathi yad e girdi’ rog e dab kurbad ngalan e yoror rom bayay.

² Jerusalem, mu chuweg e fiyath u dowam! Mu chuw u fithik’ e fiyath ngam par nga tagil’im. Gimed e girdi’ nu Zion ni ka mu kalbusgad, mu pithiged e chen ni ka ni m’ag ngomed!

³ Be ga’ar SOMOL ni Th’abi Tolang ngak e girdi’ rok, “Dani chuw’iymed ko salpiy ni ngam manged sib, ma ku aram rogon ni bay ni chuwegmed ko sib ni dab ni pi’ e salpiy ni puluwonmed ni ngan pagmed.

⁴ Nap’an nim marod ni ngam pired u Egypt ni gimed e milekag u rom, ni gimed e lanin’med ni ngam rin’ed ni aram rogon; me modyargal yu Assyria ngomed ngan fekmed ngabang ni dan pi’ ba salpiy ni pulwonmed.

⁵ Chiney u Babylon e ku aram e n’en kan rin’ ngomed; ka mu kalbusgad u rom ni da nchuw’iymed. Pi’in ni yad be gagiyeg nagmed e yad be moning ma yad be dariyfan nigeg.

⁶ Machane bayi taw nga bangiyal’ ma bay mogned ni Gag e Got, ma kug welthin ngomed.”

⁷ Rib falan’uy ni ngan guy ba tamal’og ni be yib u daken e pi burey i yib, nike fek e thin ni bfel’ i yib, ni murung’agen e gapas! Nge yib i yog nib ga’ laman ni kan gel me ga’ar ngak Zion, “Got rom e ir e pilung!”

⁸ Pi’in yad be matanagiy e binaw e yad be tolul, yad be tolulnag e felfelan’ u ta’bang. Ya kar guyed nga owcherad nike sul SOMOL nga Zion!

⁹ Pin’en ni ka ni buthug u Jerusalem, mu tolul niged e felfelan’. SOMOL e ke fal’eg laniyan’ e girdi’ rok; ke chuweg fare binaw rok u pa’ e to’ogor rok.

¹⁰ I SOMOL e bayi maruwel nga gelngin nib thothup; bayi ayuweg e girdi’ rok, ma ga’ngin e fayleng ni bay ni guy riy.

¹¹ Gimed urngin e pi’in gimed be fek mam’en e Tempel, mu chuwgad u Babylon ni ka chingiyal’ ney! Dab mmathgad nga ban’en nike yog e motochiyel ndab mmathgad ngay; mu ted gimed ni gimed ba thothup mi gimed chuw u lan e re binaw nir.

¹² Yaney e dab kum chuwgad ni gimed ba gur; ma gathi bay mu guyed rogon ni ngam thaygad! I SOMOL ni Got romed e bayi pow’iymed me yoror romed u gubin yang.

Fare tapigpig ni be gafgow

¹³ Be ga’ar SOMOL, “Tapigpig rog e bayi yan i aw nga rogon e tin be muruwliy; bayi gilbuguwan mu’un tay fan.

¹⁴ Pire’ e girdi’ nra guyed miyad gin ngak; ya ke pig ya’an ngabang ni gowa gathi ba girdi’.

¹⁵ Machane chiney e bpire’ e nam ni bay ra ngatgad ngak, pi pilung e bay ra ngatgad ngak ni ka ra paged langrad. Bay ra guyed miyad nangfan ban’en nda ur nanged.”