Isaiah 48 - Bible Ni Thothup

I Got e SOMOL ko gabul i yan ngaram

¹ Motoyilgad ko ran’ey, gimed e girdi’ nu Israel, gimed e pi’in owchen Judah: Gimed ma mow nga fithingan SOMOL ma gimed ma yog ni gimed ma liyor ngak Got nu Israel — machane dariy bbug e thin ni gimed ma yog ni aram rogon u wan’med.

² Ma kam ufgad ngay gimed be yog ni gimed girdi’en fare binaw nib thothup ni fare Got rok yu Israel e gimed be toer ngak, ni fithingan e SOMOL ni Gubin ma Rayag Rok.

³ Be ga’ar SOMOL ngak yu Israel, “Kakrom e u gog ko mang e nge buch; mu gu gagiyegnag nge taw ngay nib tomgin.

⁴ Gumnang ni bay um pired ni gimed ba gel’an, ni bod feni el e wasay ma dab m’inggad ni bod e bronze:

⁵ Ere kakrom e gu yi’iynag e tin bayib nga m’on u puluwmed, u gog e pin’en ni bayib u m’on ni dawri taw, ya nge siy mogned ni pi liyos nge pi fon romed e yad e kar gagiyeg niged ke yodrom.

⁶ “Gubin e tin u gog e go’ ke taw ngay; dabisiy ni ngamoged nriyul’ e tin u gu yi’iynag. Chiney e ngog ngomed e tin be’ech ni bay fini yib, boch ban’en nda gu dag ko som’on.

⁷ Fin chiney e kug gagiyegnag ni nge yodrom e pin’em; dariy ban’en ni aray rogon nike yodro’ kakrom. Fa’anra mang e yodroy kakrom, ma gimed ra yog ni gimed manang murung’agen.

⁸ Gu manang ni dabyag ni nge pagan’uy ngomed, ya go’ yi manangmed ni gimed ba tatogopluw. Aramfan ni dawor mu rung’aged murung’agen e ran’ey, aramfan ndariy bbug e thin riy ni thap nga telmed.

⁹ “Fan e nge mathangeluwolnag e girdi’ fithingag, er fan nikug k’adan’ug ko damumuw rog; gube fil an’ug ni nge dab gu thang owchemed.

¹⁰ Gu sikeng nagmed u fithik’ nifiyen e gafgow, ni bod e silber ni kan ranrannag ni nge macholbog u mit e nifiy. Machane kug pir’eg ni dariy ban’en ni gimed bfel’ ngay.

¹¹ N’en ni gu be rin’ e ku gu rin’ ni fan ngog — dab gu pag fithingag ngan m’aynag fan ara gu pag be’ nge fanay boch bugwag nib milfan ngog ni go’ gag ngay.”

Cyrus, ni mel’eg SOMOL ni nge yog e thin

¹² Be ga’ar SOMOL, “Mmotoyilgad ngog gimed e girdi’ nu Israel ni gag e kug piningmed! I gag Got, ko tobolngin nge tungun, kemus ni gag e Got!

¹³ Pa’ag e ngongliy e deaf ko fayleng me filath lanelang. Nap’an ni gu pining e fayleng nge lanelang ma kachingiyal’ nem miyow yib nga pe’owcheg.

¹⁴ “Mu’ulunggad ngam motoyilgad, ni gimed gubin! Dariy reb e got ni yag ni nge yi’iynag ni fare mo’on ni gu mel’eg e ra cham nga Babylon; ni bayi rin’ e n’en ni gu ba’adag ni nge rin’.

¹⁵ I gag e en ni gu non nggu pining; nggu pow’iy mu gu gagiyegnag nge fel’ rogon.

¹⁶ “Mu chugurgad ngog ngam rung’aged e n’en ni gu be yog. Aram ko tobolngin e ug non nib tamilang ma gubin ngiyal’ ni ug gagiyegnag nge yib i m’ug e thin rog nib rriyul’.” (I SOMOL Ni Th’abi Tolang e ke pi’ gelngin ngog e chiney ma ke l’oegneg.)

Tanom rok SOMOL ko girdi’ rok

¹⁷ Fare Got nib thothup nu Israel, fare SOMOL ni ayuwegmed e ga’ar: “I Gag SOMOL ni Got romed, fa en ba’adag ni nge fil ngomed e tin ni bfel’ me pow’iymed ko fare kanawo’ ni ngam marod riy.

¹⁸ “Fa’an mang e um motoyilgad ko tin kugog nigu reg e thinriy ni ngan rin’! Ma aram e ra map’ e fla’ab nga dakenmed ni bod ba lul’ ni der mlik. Ma aram bay u mu gelgad ko mael ni bod e n’ew ni be lobeb i yib nga dep’el’ay.

¹⁹ Pi’in owchamed e yad ra bod urngin e yan’, ma ra gu micheg ni dariy e ngiyal’ ni ngan thang owcharad.”

²⁰ Mu chuw u Babylon, mman nike puf rogom! Mu tolulnag murung’agen u fithik’ e felfelan’; muruwliy ngan nang u gubin yang: “I SOMOL e ke ayweg yu Israel ni tapigpig rok!”

²¹ Nap’an ni pow’iy SOMOL e girdi’ rok u daken e ted nib gowal ma ba fengfeng, ma darm’ad ko balel. I gagiyegnag e ran nge yib u fithik’ e war ni fan ngorad; i say e war nge mab, nge yib e ran riy nga wuru’.

²² Be ga’ar SOMOL, “Dariy ban’en nra ayweg e pi’in tadenen.”