Isaiah 42 - Bible Ni Thothup

Fare tapigpig rok SOMOL

¹ Be ga’ar SOMOL, “Ba’aray e tapigpig rog ni ku gu pi’ gelngin, ni fa’anem ni gag e kug turguy ni ir e bfel’ u wun’ug. Ku gu suguy ko kan nthothup rog, bayi fek e tin nib yal’uw i yib ngak urngin e nam.

² Dabi tolul ma dabi ga’nag laman, ara i welthin ni ba ga’ laman u lan e yu pa’ i kanawo’.

³ Dabi thal’uy ba ley i ro’uy nike m’ing, ma dabi thang ba magal ni be n’en ni nge math. Tin ra i par nib yal’uw e bayi fek i yib ngak urngin e girdi’.

⁴ Dabi mulan’ ma dabi pag ir, ma tin nib yal’uw e bayi tay nga fayleng. Pi nam nib mal’af e ri yad be sonnag e machib rok.”

⁵ Got e sunumiy lanelang me filath; me sunumeg e fayleng nge urngin e tin nib fos ni bay riy; me pi’ e yafos nge pogofan ngak urngin e girdi’ riy. Ma chiney e SOMOL ni Got e be ga’ar ngak e tapigpig rok,

⁶ “I Gag SOMOL e kug piningem ku gu pi’ gelngim ni ngam guy rogon ngam rin’ e tin nib yal’uw u fayleng. Ngug ngongliy bm’ag u thilmad urngin e girdi’ ni nggu rin’ u dakenam; bay gu pi’ e tamilang ngak e pi nam u dakenam.

⁷ Bay mu bing lan mit e pi malmit, ma ga chuweg u kalbus e pi’in yad be par riy u fithik’ e lumor.

⁸ “Kemus ni Gag e SOMOL ni Got rom. Dariy yugu reb e got ni ta’reb rogomow; dab gu pag e pi liyos nganog e sorok ngorad ni aram e kan unegrad ngog.

⁹ Pin’en ni kug yi’iynag e ke yib i m’ug e chiney nib riyul’. Chiney e nggu weliy ngomed boch ban’en nib be’ech u m’on ndawori m’ug.”

Ba tangin e sorok

¹⁰ Mon’ed ba tang nib be’ech ngak SOMOL; fayleng ni polo’, mu tanggad ni gimed be pining e sorok ngak! Gimed e pi’in gimed be milekag u lan e day, mpininged e sorok ngak; gimed urngin e yafos nu maday, mpininged e sorok ngak! Gimed e pi nam ni gimed bmal’af nge girdi’ ni be par riy e ngam tanggad!

¹¹ Ted ni desert nge yochi binaw riy e ngar pininged e sorok ngak Got; girdi’ nu Kedar e ngar pininged e sorok ngak! Pi’in yad be par u lan e binaw nu Sela e ngar tolul niged e felfelan’ u p’ebugul e pi burey!

¹² Pi’in yad be par ko pi nam nib mal’af e ngar pininged e sorok ngak SOMOL miyad tay fan!

¹³ SOMOL e ke yan ni nge mael nrogon be’ nib falu’ ma ba sorok; ke fal’eg rogon ni fan ko mael. Bayi tolulnag ni ngan mael; me dag gelngin nib togopluw ngak e pi to’ogor rok.

Got e be micheg nra ayuweg e girdi’ rok

¹⁴ Be ga’ar Got, “Ke n’uw nap’an ni ug par ni kug th’ab gulungag; nda ug fulweg lungun e girdi’ rog. Machane ngiyal’ ni nggu maruwel riy e ke taw nga nap’an e chiney; gu be non ni ba ga’ lungug ni bod be’ ni bpin ni nge gargel.

¹⁵ Bay gu kirebnag e yochi burey nge pi burey, mu gu mororoynag e pan nge gek’iy riy. Bay gu gagiyegnag e pi loway ni bay e lul’ riy nge ngal’ ni yungi ted ni desert, mu gu gagiyegnag e pi lipath nge par nike mlik’.

¹⁶ “Girdi’ rog ni yad ba ma’ew e bay gu pow’iyrad u daken yu pa’ i kanawo’ ndawor ra milekaggad riy. Lumor ni yad be par u fithik’ e bay gu pingeg nge ngal’ ni tamilang, ma yungi n’en nib mododongol ni bay nga m’on rorad e bay gu pacheag. Pin’ey e gu micheg, ni ri gu ra rin’.

¹⁷ Urngin e pi’in yad be toer ngak e pi liyos, ni kar ted e liyos nike mang got rorad e bay ra tamra’gad nike m’ayfarad.”

Yu Israel nde mit ban’en ngorad

¹⁸ I SOMOL e be ga’ar, “Motoyilgad, gimed e pi girdi’ baling! Gimed e malmit, mu uthumed e changar romed!

¹⁹ Gur bay be’ ngabang ni kab gel e ma’ew rok ngak e tapigpig rog, kab gel e baling rok ngak e en ni gu l’oeg nge yib i yog e thin rog?

²⁰ Israel, pire’ ban’en ni kam guy, machane mang fan u wun’um? Bay telim ni ngam rung’ag ban’en ngay, machane ba mang e ka mu rung’ag?”

²¹ I SOMOL e ba Got ni ba’adag ni nge chuwegem u pa’ e to’ogor rom, ere ba’adag ni ngan tayfan e motochiyel nge thin rok.

²² Machane chiney e ka ni fek e chugum ko girdi’ rok u fithik’ e yargel; kan lok nagrad u lan e kalbus ni bay u tan e but’ ma kan mithagrad nga kalbus. Ka ni fek e chugum rorad u fithik’ e yargel, ma dariy be’ ni nge yib i ayuwegrad.

²³ Mini’ e aromed ni bayi motoyil ko pin’ey? Rayag ni ngam fal’eged e motoyil e chiney i yan ngaram?

²⁴ Mini’ e ke pi’ yu Israel nga pa’ e to’ogor rorad ka ni fek e chugum rorad? I SOMOL, ni ir e ud denengad nib togopluw ngak! Da ud pired nrogon ni ba’adag ni ngad pired ara u da folgad ko machib rok.

²⁵ Ere gagiyeg nagdad ngad thamiyed gelngin e damumuw rok, ngad gafgowgad u fithik’ e mael. Damumuw rok e bod ba nifiy ni yan u lan yu Israel ni ga’ngin, machane da ud nanged fan; dariy ban’en ni mit ngodad riy.