Isaiah 38 - Bible Ni Thothup

M’ar nge gol ni tay Hezekiah ni Pilung

¹ Bingyal’ ko ngiyal’ i n’ey me m’ar Hezekiah ni Pilung ni chugur ni nge yim. Me yan Isaiah ni profet nib mo’on ni fak Amoz nge yan i guy nge ga’ar ngak, “I SOMOL e be yog ngom ni ngam yarmiy urngin ban’en nge fel’ rogon ni bochan e gur e dab kum gol. Ma ga fal’eg rogom ni ngamum’.”

² Me cheleg Hezekiah owchen ko rungrung nge meybil:

³ “SOMOL, dab mu pag talin ni ri gub yul’yul’ u rogon ni ug pigpig ngom ma urngin ngiyal’ ma ug guy rogon ni nggu rin’ e n’en ni ga ba’adag ni nggu rin’.” Me tabab ko yor ni almarin.

⁴ Ma aram me l’og SOMOL Isaiah

⁵ ni nge sul ngak Hezekiah nge ga’ar ngak, “I Gag, SOMOL, ni Got rok David ni ga’ rom kakrom, e kug rung’ag e meybil rom ma kug guy lu’am; bay gu tem ndab mum’ ni ragag nge lal e duw n’umngin nap’an.

⁶ Bay gu ayuwegnem nge binaw nu Jerusalem u pa’ e emperor nu Assyria. Ma bay kug par ni gag e gu be yoror riy.”

⁷ Me fulweg Isaiah ni ga’ar, “I SOMOL e bayi pi e pow ngomed nge m’ug ni n’en ni micheg e ra tay u gil’.

⁸ Ni fare tawo’ ni toy Ahaz ni Pilung, e bayi gagiyegnag SOMOL fon u but’ nge sul nga tomur ni go nap’an ragag yay nike n’uf be’ ay.” Ma aram e fon fare tawo’ e sul nga tomur ni ragag yay.

⁹ Tomuren nike gol Hezekiah ko m’ar rok, me yoloy e re tang ko sorok ni ba’aray:

¹⁰ Gu leamnag ni bay gum’ ko ngiyal’ ni kari taw nga fel’ngin e yafos rog nggu wan ko fare fayleng ko yam’, ni dab gu par nge mus n’umngin e yafos rog.

¹¹ Gu leamnag ni lan e biney e fayleng ni yibe par riy e dariy e ngiyal’ ni kug ra guy SOMOL bayay ara be’ ni kabfos.

¹² Ya yafos rog e kan th’ab kemus, ni bod ba tent ni kan pilig nga but’, ni bod e mad ni kan th’ab ko fare n’en ni yima lifith e mad riy. Gu leamnag nike museg Got e yafos rog.

¹³ N’umngin e nnep’ ma gu ma gel’gel’ ngalang ko amith, ni gowa be tet’ar ba layon e yil rog. Gu leamnag nike museg Got e yafos rog.

¹⁴ Lamag e achichig me me’waer, mu ug moen ni bod ba arache’ ni dove. Me magaf e tir u marwag ko changar ngalang. SOMOL, mu lageg u fithik’ gubin e tiney e gafgow.

¹⁵ Mang e rayag ni nggog? SOMOL e ke rin’ e ran’ey ni aray rogon. Ke tagan lanin’ug, ni dabkiyag e mol rog.

¹⁶ SOMOL bay gu par ni fan ngom, ni kemus ni gur e fan ngom; mu gol nageg ngam teg ni dab gum’.

¹⁷ Buchbuchan’ rog e bayi pilyeg nge ngal’ ni gapas. Gur e ka mu ayweg e pogofan rog u fithik’ gubin e riya’; kamn’ag machan gubin e denen rog u wun’um.

¹⁸ Dariy ta’be’ ko fayleng ko yam’ nrayag ni pining e sorok ngom; pi’in yad ba yam’ e dabiyag ni nge pagan’rad nga fanam yul’yul’.

¹⁹ Pi’in nib fos e yad ma pining e sorok ngom, ni bod ni gu be pininge e sorok ngom e chiney. Pi matam e yad ma yog ngak pifakrad fanam yul’yul’.

²⁰ SOMOL kam gol nigeg. Bay gu chubeged e musik ni harp magmad tangnag e sorok ngom, u lan e Tempel rom u n’umngin nap’an e yafos romad.

²¹ Isaiah e yog ngak Hezekiah ni Pilung ni nge pirdi’iy e gek’iy ni fig nge tay ko lot u downgin, ya nge gol.

²² Miki fith Hezekiah ni Pilung ni ga’ar, “Mang e pow riy nrayag ni nggu wan nga talang ko naun rok SOMOL?”