Isaiah 35 - Bible Ni Thothup

Ba fare Kanawo’en e Thothup

¹ Bay i felfelan’ e ted ni desert, ma floras e bay i puf ko yungi binaw ni kan pag.

² Ted ni desert e bayi tang ma be tolulnag e felfelan’; bayi bod feni fel’ ya’an e Burey nu Lebanon, ma ba yong’ol e but’ riy ni bod e ted u Karmel ngu Sharon. Gubin e girdi’ ni bayi guy e muluplup rok SOMOL, nge feni ga’ nge feni gel gelngin.

³ Mu pi’ gelngin e pi pa’ef ndakuriy gelngin, nge pi bug ni be da’da’ nike me’waer.

⁴ Nganog ko pi’in ke mulan’rad ni ngan ga’ar, “Mu pired ni gimed ba gel ma dab mu rusgad! Got e bayib i ayuwegmed, me gechignag e pi to’ogor romed.”

⁵ Pi ma’ew e bay ra guyed ban’en ma pi biling e bay rrung’aged ban’en.

⁶ Pi mugutgut e bay ra oggad ngalang ngu’ur churu’gad, ma pi’in ndabiyag ni ngar nonod e bay ur tolul niged e felfelan’. Ma bay i yan yu pa’ i lul’ u daken e ted ni desert;

⁷ ma yan’ ni be yik u desert e bayi ngal’ ni bangi lipath, ma yungi but’ nike mlik e bayi sug ko alublub. Ma gin i par e gamanman ni jackal riy e bay i tugul e pan nge ro’uy riy.

⁸ Bayi sum ba pa’ i kanawo’ ni ba ga’ riy, ni fithingan ni bay u nog e “Kanawo’en e Thothup.” Dariy ba tadenen nra yan u daken e re kanawo’ nem; girdi’ ni be yan u daken e re kanawo’ nem e dakuriy be’ nib balyang nra waliyrad ko kireb.

⁹ Ma dariy e gamanman ni layon riy; ma dariy e gamanman riy nma cham. Pi’in ke lagrad SOMOL u fithik’ e gafgow e yad ra yan nga taferad u daken e re kanawo’ nem.

¹⁰ Ma bay ra tawgad nga Jerusalem nike felan’rad, ni yad be tang ma yad be tolulnag e felfelan’. Ma bay ur pired ni yad be felfelan’ ndariy n’umngin nap’an, ndabki yib e kireban’ nge gafowan’ ngorad.