Genesis 5 - Bible Ni Thothup

Pi’in ni owchen Adam nge yan i mada’ ngak Noah nge pifak

¹ Irera’ fithingan e pi’in owchen Adam nni yoloy. (Nap’an ni sunmeg Got e girdi’, me ngongliyrad ni bod ya’an.

² I sunumeg be’ nib mo’on nge be’ ni bpin, me fal’eg wa’athrow, me tunguy fithingrow ni “Girdi’”.)

³ Nap’an ni gaman 130 e duw rok Adam, min gargeleg bochi pagel ni fak nib fil ya’an, me tunguy fithingan ni Seth.

⁴ Ni gargelnag Seth, ma 800 e duw niki par Adam nib fos miki fakay boch e bitir

⁵ me yim’ nike gaman 930 e duw rok.

⁶ Nap’an ni gaman 105 e duw rok Seth, min gargeleg bochi pagel ni fak ni Enosh,

⁷ tomuren ni kan gargeleg Enosh miki par Seth nib fos nge yan i gaman 807 e duw. Miki fakay boch e bitir

⁸ me yim’ nike gaman 912 e duw rok.

⁹ Nap’an ni gaman mereb i ragag e duw rok Enosh, min gargeleg bochi pagel ni fak ni Kenan,

¹⁰ tomuren ni kan gargeleg Kenan. Miki par Enosh nib fos nge yan i gaman 815 e duw. Miki fakay boch e bitir

¹¹ me yim’ nike gaman 905 e duw rok.

¹² Nap’an ni gaman medlip i ragag e duw rok Kenan, min gargeleg bochi pagel ni fak ni Mahalalel,

¹³ tomuren ni kan gargeleg Mahalalel miki par Kenan nib fos nge yan i gaman 840 e duw. Miki fakay boch e bitir

¹⁴ me yim’ nike gaman 910 e duw rok.

¹⁵ Nap’an ni gaman nel’ i ragag nge lal e duw rok Mahalalel, min gargeleg bochi pagel ni fak ni Jared,

¹⁶ tomuren ni kan gargeleg Jared miki par Mahalalel nib fos nge yan i gaman 830 e duw. Miki fakay boch e bitir

¹⁷ me yim’ nike gaman 895 e duw rok.

¹⁸ Nap’an ni gaman 162 e duw rok Jared, min gargeleg bochi pagel ni fak ni Enok,

¹⁹ tomuren ni kan gargeleg Enok miki par Jared nib fos nge yan i gaman 800 e duw. Miki fakay boch e bitir

²⁰ me yim’ nike gaman 962 e duw rok.

²¹ Nap’an ni gaman nel’ i ragag nge lal e duw rok Enok, min gargeleg bochi pagel ni fak ni Methuselah.

²² Tomuren ni kan gargeleg Methuselah miki par Enok nib fos ni 300 e duw ngi i liyor ngak Got miki fakay boch e bitir.

²³ Miki par nib fos nge yan i gaman 365 e duw rok.

²⁴ I par Enok ni be fol rok Got, ma aram mada kun guy ni bochan e ke fek Got.

²⁵ Nap’an ni gaman 187 e duw rok Methuselah, min gargeleg bochi pagel ni fak ni Lamek,

²⁶ tomuren ni kan gargeleg Lamek miki par Methuselah nib fos ni 782 e duw. Miki fakay boch e bitir

²⁷ me yim’ nike gaman 969 e duw rok.

²⁸ Nap’an ni gaman 182 e duw rok Lamek, min gargeleg bochi pagel ni fak

²⁹ me ga’ar, “Re tir ney e ra pi’ e toffan nga urngin e maruwel nib gel ni gadad be tay; ya bucheg SOMOL wa’athan e re but’ ney”; ma aram me tunguy fithingan ni Noah.

³⁰ Tomuren ni kan gargeleg Noah miki par Lamek nib fos ni 595 e duw. Miki fakay boch e bitir

³¹ me yim’ nike gaman 777 e duw rok.

³² Ma fa’an ni gaman 500 e duw rok Noah, me fakay dalip i pagel, ni aram Shem, Ham nge Jafeth.