Genesis 46 - Bible Ni Thothup

Jakob nge girdi’en e tabinaw rok nranod nga Egypt

¹ Me kunuy Israel urngin ban’en rok nge yan nga Beer-sheba, mi i pi’ e maligach u rom ngak e Got rok Isak ni chitamngin.

² Me non Got ngak Israel nnep’ ni ga’ar, “Jakob, Jakob.” Me ga’ar Jakob, “Gu be motoyil.”

³ Me ga’ar, “I gag Got, ni Got rok e chitamam. Dab mu tamdag ni ngam man nga Egypt; ya pi’in owchem e bay gu gagiyeg nagrad u rom ngar manged girdi’en reb e nam ni ba ga’.

⁴ Bay gu un ngom nga Egypt, ma bay gu fulweg e pi’in owchem ngaray. Mra taw nga nap’an ni nga mum’ ma bay Josef u to’obem.”

⁵ Me chuw Jakob u Beersheba. Fapi pagel e ra ted e chitamangirad, nge pifakrad, nge pi le’engirad ngalan fapi wagon nike pi’ fare pilung nu Egypt.

⁶ Miyad fek e gamanman rorad nge urngin ban’en rorad ni yag ngorad u Kanaan ngranod nga Egypt. Me fek Jakob urngin e pi’in owchen ngar uned ngak,

⁷ ni aram pifak ni pumo’on, nge pi pumo’on ni pifakrad, nge ppin ni pifak, nge pi ppin ni fak pifak.

⁸ Irera’ fithingan fapi pumo’on ni pifak Israel nra uned ngak nga Egypt. Ruben ni ir e bin nganni’ u fak Jakob,

⁹ nge pi pumo’on ni pifak Ruben: Hanok, Pallu, Hezron, nge Karmi.

¹⁰ Nge Simeon nge pifak ni pumo’on: Jemuel, Jamin, Ohad, Jakin, Zohar nge Shaul, ni fak row be’ ni bpin nu Kanaan.

¹¹ Nge Levi nge pifak ni pumo’on: Gershon, Kohath nge Merari.

¹² Nge Judah nge pifak ni pumo’on: Shelah, Perez nge Zerah. (Fagal ni baaram e bitir rok Judah, ni Er nge Onan e karm’ow u Kanaan.) Ma pumo’on ni fak Perez e Hezron nge Hamul.

¹³ Nge Issakar nge pifak ni pumo’on: Tola, Puah, Jashub nge Shimron.

¹⁴ Nge Zebulun nge pifak ni pumo’on: Sered, Elon nge Jahleel.

¹⁵ Pi pagel ney e diyannag Leah rok Jakob u Mesopotamia nge kureb e bpin ni Dinah. Yad urngin ni yad owchen Jakob rok Leah ni yad guyey nge dalip u gubin.

¹⁶ Gad nge pifak ni pumo’on: Zefon, Haggi, Shuni, Ezbon, Eri, Arod nge Areli.

¹⁷ Asher nge pifak ni pumo’on: Imnah, Ishvah, Ishvi, Beriah nge Serah ni walagrad ni bpin. Ma fak Beriah ni pumo’on e Heber nge Malkiel.

¹⁸ Pi pagel ney ni yad ragag nge nel’ e yad e pi’in owchen Jakob rok Zilpah, ni aram fare sib ni pi’ Laban ngak Leah ni fak.

¹⁹ Le’engin Jakob ni Rachel e diyannag l’agruw e pumo’on: Josef nge Benjamin.

²⁰ U lan yu Egypt e fakay Josef l’agruw e pumo’on riy, ni Manasseh nge Efraim, rok Asenath, ni be’ ni bpin ni fak Potifera, ni ir e prist u lan yu Heliopolis.

²¹ Pifak Benjamin ni pumo’on e Bela, Beker, Ashbel, Gera, Naaman, Ehi, Rosh, Muppim, Huppim nge Ard.

²² Picha’ney ni yad ragag nge aningeg e yad e pi’in owchen Jakob rok Rachel.

²³ Dan nge fak ni pumo’on ni Hushim.

²⁴ Naftali nge pifak ni pumo’on: ni Jahzeel, Guni, Jezer nge Shillem.

²⁵ Picha’ney ni yad medlip e yad owchen Jakob rok Bilhah, fare sib ni pi’ Laban ngak Rachel ni fak.

Jakob nge girdi’en e tabinaw rok u lan yu Egypt

²⁶ Ma urngin e pi’in ni owchen Jakob ni yan nga Egypt e yad nel’ i ragag nge nel’, ni dan uneg pi le’engin pifak ngay.

²⁷ Ma ku l’agruw e pagel nni gargeleg ni fak Josef u Egypt, nge yan i gaman medlip i ragag u gubin girdi’en e tabinaw rok Jakob ni yan nga Egypt.

²⁸ Me l’oeg Israel Judah nge m’on nge yan ngak Josef nge wenig ngak ni nge yan i guy Israel nga Goshen. Fa’an rabad ko nug nu Goshen,

²⁹ me af Josef ngalan e chariot rok nge yan nga Goshen ni nge mada’nag e chitamngin. Ma nap’an nra mada’gow, me gumuchmuch Josef nga belel’ugun e chitamngin, me yor nib n’uw nap’an.

³⁰ Me ga’ar Israel ngak Josef, “Chiney e gu ra yim’ ma bfel’, ya kug guyem kug nang ni kagabfos.”

³¹ Me ga’ar Josef ngak pi walagen ni pumo’on nge girdi’en e tabinaw rok e chitamngin, “Thingar gu wan gguy Farao nge lungug ngak, ‘Pi walageg ni pumo’on ni girdi’en e tabinaw rok e chitamag ni ur pired u Kanaan e karbad ngog!

³² Pi’in ni pumo’on u fithik’rad e yad ma gafaliy e saf nge garbaw; kar feked i yib yu ran’ i saf nge kaming ni fakrad nge yu ran’ i garbaw, nge urngin e tin bay rorad.’

³³ Fa’anra fithmed Farao ni ga’ar, ‘Mang e n’en ni gimed ma muruwliy?’

³⁴ me lungumed, ‘Gamanman e ug gafaliyed ni ka gamad bbitir ke mada’ ko chiney ni bod ni i rin’ pi chitamngimad ni kab kakrom i yib.’ Ya ara’ rogon me yag ni mpired u lan e nug nu Goshen.” I yog ngorad ni aram rogon ni bochan e girdi’ nu Egypt e daburad e pi’in yad ma gafaliy e saf.