Ezekiel 21 - Bible Ni Thothup

Saydon rok SOMOL

¹ I SOMOL e non ngog

² ni ga’ar, “Fak e girdi’, mu tay owchem rok yu Jerusalem, mu non nib togopluw ko yungi n’en ni tagil’ e meybil. Mog ko nam nu Israel

³ ni Gag SOMOL, e gu be ga’ar: I gag e to’ogor romed. Bay gu girengiy e saydon rog nggu thang e pogofan romed ngay ni gimed gubin, ni pi’in ni bfel’ nge pi’in kireb ni ta’reb rogon.

⁴ Bay gu dumow ko saydon rog nggu togopluw ngak gubin e girdi’ ko lel’och nge taw ko yimuch.

⁵ Ma aram e gubin e girdi’ nra nang ni Gag SOMOL e kug girengiy e saydon rog ma dab kug sulweg nga tafen.

⁶ Fak e girdi’, mu gel’gel’ ni bod ni kari ming lanin’um u fithik’ e mathliyab. Mu gel’gel’ u fithik e kireban’ ko gin nrayag ni yaliyem gubin e girdi’ riy.

⁷ Nap’an ni yad ra fithem ko mangfan ni ga be gel’gel’, ma gog ngorad ni bochan e thin nib be’ech ni bayi taw. Nap’an nra taw, me suguy e marus lanin’rad, me ul pa’rad, ni mathliyab, me dada’ bugrad. Re ngiyal’ i n’em e ketaw ngay; ketaw ngaray e chiney.” I SOMOL ni Th’abi Tolang e be non.

⁸ Me ga’ar SOMOL ngog,

⁹ “Fak e girdi’, mu yi’iynag e n’en ni nge buch. Mog ko girdi’ e n’en ni gu be yog I Gag SOMOL e gu be ga’ar: Ba saydon, ba saydon ni kan uthum ma ka ni gichiy.

¹⁰ Kari m’uth ni ngan cham ngay, ka ni gichiy ni nge mat ni bod e uluch. Dakriy be’ nrayag ni felfelan’ ni fan e gubin e girdi’ e ra feked yathin gubin e tin ni u gog nra buch nge gechig nra yib.

¹¹ Kan mu’ i be’echnag fare saydon, ni kan falfal’eg rogon ni ngan cham ngay. Kan uthum ka ni gichiy, ni ngan tay ngalan pa’ e en ni nge thang e pogofan.

¹² Fak e girdi’, mu go’go’ u fithik’ e gafgowan’; re gi saydon ney e ri fan ko girdi’ rog nge gubin e tayugang’ nu Israel. Bay ni unegrad ko girdi’ rog ngan li’rad. Mu pirdi’iyed pa’med nga daken ngarngorenmed u fithik’ e mathliyab!

¹³ Gu be sikengnag e girdi’ rog, ma fa’an dab ra pi’ed keru’rad ko kireb rorad, ma go’ ra buch e pin’ey rorad.

¹⁴ “Fak e girdi’, chiney e ngam yi’iy. Mu waynag pa’am me cham fare gi saydon bayay nge bayay. Irera’ fare saydon nma cham, ma k’aring e marus mma thang e pogofan.

¹⁵ Ma waliy e girdi’ rog nge mulan’rad miyad dol’. Bay gu k’aring e marus ko binaw rorad ko fare gi saydon ni be mat ra’en ni bod e uluch, nib fal’eg rogon ni nge cham.

¹⁶ Gur saydon ni gab m’uth, mu dumow ko mat’aw nge gilay’! Mu dumow u gubin yang ni ga be cheal ngay.

¹⁷ Bay kug waynag pa’ag, me m’ay e damumuw rog. I Gag SOMOL e gu be non.”

Fare saydon rok e pilung nu Babylon

¹⁸ I non SOMOL ngog

¹⁹ ni ga’ar, “Fak e girdi’, mu tay e pow nga daken l’agruw i kanawo’ ni nge yib e pilung nu Babylon riy ni bay e saydon rok. Lagruw pa’ i kanawo’ nem e nge tabab u lan ta’ab binaw. Mu suweg ban’en ngalang ni pow ko gin ni dar e gal pa’ i kanawo’ nem riy.

²⁰ Reb e be dag ngak fare pilung e wo’ ngak piyu Ammon ko binaw u Rabbah, ma reb e be dag bpa’ ni sor nga Judah, ko fare binaw nu Jerusalem ni kan yororiy.

²¹ Fare pilung nu Babylon e sak’iy nga charen fa gin’en ni pow ko madar ko fa gal pa’ i kanawo’. Me rurug gan e gating rok; me fith lanyan’ e pi liyos rok; me fal’eg i yaliy adin ba gamanman ni maligach, ni nge nang e re pa’ i kanawo’ ni nge yan riy.

²² Ma aram me yan i magey reb e gan e gat’ing u lan e ba’ ni mat’aw i pa’ ni fen yu Jerusalem! Nike yog ngak ni nge yan nge fal’eg rogon e bilgarog, me tolul ni ngan mael, ni ngan gad e bil garog ko pi garog, min fu’og e but’ ngalang, min ker e lra’.

²³ Girdi’ nu Jerusalem e de mich u wan’rad e biney ni bochan fapi m’ag nra ngongliyed u thilrad. Machane biney e yi’iy e be pugoran ngorad e denen rorad ma ke gagyelnag ngorad ni bay ni kolrad.

²⁴ Ri irera’ e n’en ni Gag SOMOL ni Th’abi Tolang e gu be yog: Denen romed e ke gagyal. Ni gubin e girdi’ nike nang e kireb romed. Ke m’ug e kireb romed u fithik’ urngin e ngongol romed. Yira gechig nagmed, bay gu pi’med nga pa’ e pi to’ogor romed.

²⁵ “I gur e re tagagiyeg nu Israel ni kireb nir, birom e rran, ni rran ko yay ntomur e gechig rom, e ke yib.

²⁶ I Gag SOMOL ni Th’abi Tolang e kugog e pi thin ney. Mu chuweg u lolugem e te’elyaw ko pilung nge fare turban. Dakriy ban’en nra par u gil’. Nge sak’iy e pi’in gafgow nge gagiyeg, min girengiy nga but’ e pi’in nma gagiyeg!

²⁷ Nge puth! Nge puth! Bay gu pag fare binaw nge mogothgoth. Machane dabi buch e ran’ey nge mada’ ko ngiyal’ nike yib e cha’ ni ku gu mel’eg ni nge gechignag fare binaw. Ni ir e bay gu pi’ nga pa’.

Ba saydon nge piyu Ammon

²⁸ “Fak e girdi’, mu yi’iy. Mu weliy ko girdi’ nu Ammon e n’en ni gu be yog, I Gag SOMOL ni Th’abi Tolang, yad be dariyfan nag yu Israel. Ere mu ga’ar ngorad: ‘Ba saydon e ke fal’eg rogon ni nge cham; Kan gichiy ni nge mathang pogofan, nge mat ni bod e uluch.

²⁹ Pin’en ni be pig owchemed ngu’um guyed e go’ bogi ban’en, nge fapi yi’iy ni gimed be yog e go’ ban. Gimed ba kireb ma ba kireb e leam romed, ma fare rran romed e nge anog, ni fare rran ni tomuren e gechig romed. Fare gi saydon e nge aw nga belel’ugunmed.

³⁰ “‘Mu sulweged e saydon romed nga tafen! Bay gu pufthin nagmed ko gin nsunmiymed riy, u lan e re binaw nni gargelegmed riy.

³¹ Bay mu thamiyed e damumuw rog u nap’an ni gu ra th’ab gufan nga dakenmed ni bod e daramram. Ma bay gu pi’med nga pa’ e girdi’ ni kireb, nib salap ko mathang pogofan.

³² Bay ni thang owchemed ko nifiy. Ma racha’enmed e bay ni pu’og u lan tafenmed, ni dariy be’ ni kigimed ra yib ngan’.’” I SOMOL e be non.