Ezekiel 19 - Bible Ni Thothup

Ba tang ko kireban’

¹ I SOMOL e yog ngog ni nga gon’ e re daloloy’ ney ni fen l’agruw i fak e pilung nu Israel:

² Chitinam e ri bod ba layon ni bpin! Ni chugliy fak u fithik’ e layon ni pumo’on nib damumuw.

³ Ni chugiliy reb i fak ma be fil rogon ngak ni ngi i fita’; me nang rogon ni nge longuy e girdi’.

⁴ Me rung’ag e pi nam murung’agen miyad thabeynag ngalan ba low. Miyad l’eg ngar girngiyed i yan nga Egypt.

⁵ Chitiningin e i sonnag ni nge sul me nang nike mathliben. Ma aram miki chugliy reb i fak, nge ilal ni ba layon nib damumuw.

⁶ Nap’an ni yan i taw nga gil’isowon, me un nga boch e layon ngu’ur fita’ niged e tin ngar longuyed. Miki fil rogon ni ngi i fita’ nag me languy e girdi.

⁷ I buthug e yoror me gathay e yochi binaw. Gubin ngiyal’ nra tolul me dugow gubin e girdi’ ko fare nam.

⁸ I ta’reb lungun e pi nam ni ngan li’; i yib e girdi’ u gubin yang. Rab ra paged e pi nug miyad kol ko nug rorad.

⁹ Miyad tay ngalan ba chum ko gamanman ngar feked i yan ko pilung nu Babylon. Min tay e matnag rok, ya nga dabkun rung’ag bayay e tolul rok u daken e burey nu Israel.

¹⁰ Chitinam e bod bake grape ni kan yung u charen e lul’. I yo’or yuwan nge wom’ngin ni bochan e ran nib yo’or.

¹¹ Ba gel papa’ngin me ga’ min fanay ni sog ko pilung. Fare ke grape e n’uw kaen nra dead ko manileng; ni gubin e girdi’ ni guy feni yo’or yuwan nge feni n’uw kaen.

¹² Machane u fithik’ e damumuw, min pug lik’ngin ngalang nga non’ nga daken e but’. Meb nifngin e ngek nge fengfengnag wom’ngin. Me m’ingm’ing papa’ngin; nge mlik’ min orfeg.

¹³ Me’ere chiney e kan yung u daken e ted, ko but’ nib mlik ni dariy e ran riy.

¹⁴ Kenggin fare ke grape e aw e nifiy ngay; me mo’ruf papa’ngin nge wom’ngin. Me par ndakriy reb i pa’ngin nib gel; ni dabkiyag ni yira fanay ni sog ko pilung. Re tang ney e rib tang ko kireban’ ara ba dololoy’; ni yugu yima yin’.