Exodus 35 - Bible Ni Thothup

Rogon Yalen e Sabbath

¹ Me kunuy Moses gubin fapi girdi’ nu Israel nga ta’bang me ga’ar ngorad, “Ba’aray e pin’en keyog SOMOL ni ngam rin’ed:

² Nel’ e rran ni ngam ngongliyed e maruwel romed, machane rofen ni medlip e ngam ted nib thothup ya yaran e toffan ni ni aram e re rran ni ngan ognag ngog, i Gag SOMOL. Yug en nra ngongliy ba maruwel ko rofen ney e yira thang e fan rok.

³ Mus nga bochi nifiy ma dab mu ko’oreg u tabnaw romed ko rran ni Sabbath.”

Pin’en ni yima ognag ni fan ko fare Tent ni ba Thothup

⁴ Me ga’ar Moses ko girdi’ nu Israel, “Ba’aray e tin keyog SOMOL ni ngan rin’:

⁵ Ngan pi’ e maligach ngak SOMOL. Pi’in nib magan’rad ngay e ngar feked i yib e gol, silber, ara bronze;

⁶ nge mad ni wech; fa bunu’en e saf ni kan k’ad ke ra’en mak’ef, purple, nge row; nge mad nni ngongliy u bunu’en e kaming;

⁷ nge keru’ e saf ni pumo’on ni kan k’ad ko row; nge keru’ e kaming; nge gek’iy ni acacia;

⁸ nge gapgep ni fen e magal; pin’en ni bfel’ bon ni yima fanay ko fare gapgep ni fen e mathiy, nge fa pin’en ni bfel’ bon ni fen e incense;

⁹ nge malang ni onyx nge tagil’ fapi malang, ni fen fare efod nge fare gi mad ni fen ngorngoren fare Prist ni Th’abi Ga’.

Tatalin Fare Tent u P’eowchen SOMOL

¹⁰ “Gimed gubin e pumo’on ni bay e salap romed e ngam ngongliyed urngin e tin keyog SOMOL ni ngan ngongliy:

¹¹ ni aram fare Tent, nge upong riy, nge pi lam riy nge pi chayam riy, nge pi ralap riy, nge pi rumog riy nge pi ayan;

¹² nge fare Kahol ko M’ag, nge mat’ riy, nge upongen, nge fare gi kateng ni nge rungrunguy;

¹³ nge fare tebel, nge mat’ riy, nge gubin mam’en; nge fare flowa ni kan ognag ngak Got;

¹⁴ nge fare tagil’ e magal nge mam’en; nge fapi magal nge gapgep ni ngan fanay ngay;

¹⁵ nge fare altar ni yima urfiy e incense u daken, nge mat’ riy; nge fare gapgep ni fen e mathiy; nge fare incense ni bfel’ bon, nge fare gi kateng ni fen langan e mab ko fare Tent;

¹⁶ nge fare altar ni yima urfiy e pi maligach ni mo’oruf u daken, nge fare gi waya riy nni ngongliy ko bronze, nge mat’ riy, nge gubin mam’en; nge fare raba’ i dabiy ni yima luknag pa’ay nge rifrifen ey riy, nge ayal riy;

¹⁷ nge pi kateng ni yoror, nge rumog riy nge ayal riy; nge fare gi kateng ni yima pag u langan e garog ko fare yoror;

¹⁸ nge pin’en ni yuluy ko fare Tent nge gufan fare Tent, nge rungrung riy;

¹⁹ nge fapi mad rok e prist nrib gamog ni nga ron’ed u nnap’an ni ngar pigpiggad u lan fa Gin nib Thothup — fapi mad nib tabgul ni fan ngak Aron ni prist nge pifak ni pumo’on.”

Girdi’ nra feked i yib e tin ngar og niged

²⁰ Ma aram me chuw gubin e girdi’ nu Israel u p’eowchen Moses.

²¹ Ma gubin e pi’in ke m’ag u wan’rad ni aram rogon, e ra bagyad me fek i yib ban’en ni maligach rok ngak SOMOL ni ngan ngongliy riy fare Tent u p’eowchen SOMOL. Ra feked i yib gubin ban’en nib t’uf u yagegen e liyor nge tin ngan ngongliy madan fapi prist ngay.

²² Ere rabad ni ppin nge pumo’on ni pi’in nib magan’rad ngay, ni kar feked i yib bogi ping ni bfel’ ya’an, nge talbuch, nge luwaw, nge churwo’, nge gubin mit nunuwan dowey nni ngongliy ko gol, ngar pi’ed ni aram e kar og niged ngak SOMOL.

²³ Gubin e girdi’ ni bay e mad ni wech rorad; fa bunu’en e saf ni kan k’ad ko ra’en mak’ef, purple, ara row; nge mad nni finathiy u bunu’en e kaming; nge keru’ e saf ni pumo’on ni kan k’ad ko row, nge keru’ e kaming, e yi go’ ra feked i yib.

²⁴ Ma gubin e pi’in nrayag ni ngar pi’ed e silber, ara bronze e ra feked i yib ni maligach rorad ngak SOMOL, ma pi’in bay e gek’iy ni acacia rorad nrayag ni ngan fanay nga reb e maruwel e ra feked i yib.

²⁵ Ma gubin e ppin ni bay e salap rorad e ra feked i yib e tret ni wech nge tret nib ra’en mak’ef, purple, nge row.

²⁶ Ma kur fal’eged e tret u bunu’en e kaming.

²⁷ Ma pi’in yad ma yog e thin u Israel e ra feked i yib e malang ni onyx ni ngan gabliy ko fare efod nge fare gi mad u daken ngarngoren e prist,

²⁸ nge pi spices, nge gapgep ni fen e magal, nge fare gapgep ni fen e mathiy, nge fapi incense ni bfel’ bon.

²⁹ Gubin e girdi’ nu Israel ni ppin nge pumo’on nib magan’rad ngay e yi go’ ra feked ban’en i yib ni fan ko fare maruwel nike yog SOMOL ngak Moses ni ngan rin’.

Pi girdi’en e maruwel ko fare Tent u p’eowchen SOMOL

³⁰ Me ga’ar Moses ngak piyu Israel, “I SOMOL e ke mel’eg i Bezalel nib mo’on ni fak Uri ma Hur e tutuw rok ni be’ ko fare ganong rok Judah.

³¹ Ke suguy Got facha’ nga gelngin, ni nge salap i ngongliy ban’en, me yag rok ni nge ngongliy’, me tamilangan’ ko gubin ban’en ni yima ngongliy nga pa’ay,

³² ni ba sorok i gonpiy ya’an bogi ban’en ngi i fal’eg rogon ko gol, silber, nge bronze;

³³ ma ku ba cheag i th’ab e malang nib tolang puluwon nge ayliy, nge rogon i ker ya’an ban’en nga daken yungi ren, nge gubin mit e salap i muruwliy ban’en nga pa’ay.

³⁴ Ke pi’ SOMOL e salap ngak nge Oholiab nib mo’on ni fak Ahisamak, ni be’ ko fare ganong rok Dan, ni ngar filew e pi salap nem ngak boch e girdi’.

³⁵ Ke pi’ e salap ngorow u gubin mit ban’en ni yima ker ya’an nga daken e malang, nge rogon i yoloy ya’an ban’en, nge rogon i lifith e mad ni wech; nge bunu’en e saf ni kan k’ad ko ra’en mak’ef, purple, nge row; nge ku boch e mad. Yow manang rogon i muruwliy gubin e maruwel, ma yow ba salap i yoloy ya’an, nge ker ya’an ban’en.