Exodus 25 - Bible Ni Thothup

Pin’en ni yima ognag ni fan ko fare Tent nib thothup

¹ Me ga’ar SOMOL ngak Moses,

² “Mog ngak piyu Israel ngar og naged ban’en ngog. Demturug ko mang e ba’adag be’ ni nge pi’ ngog ma ga fek.

³ Pin’ey ni ngan ognag e: gol, silber, nge wasey ni bronze;

⁴ nge mad nib wechwech, nge bunu’en e saf nib ra’en mak’ef, nge purple, nge row, nge mad nni lifith ko bunu’en e kaming;

⁵ nge keru’ e saf ni pumo’on ni kan k’ad ko row; nge keru’ e kaming; nge ren ko gek’iy ni acacia;

⁶ nge gapgep ni fen e magal; nge pi spices ni fen e mathiy ko en ni nge yan nga reb e liw ma fen e pin’en ni bfel’ bon ni yima urfiy;

⁷ nge malang ni carnelian nge ku boch e churwo’ nib tolang puluwon ni ngan gabdiy ko fare efod u daken ngorngoren e mad ko fare Prist ni Th’abi Ga’.

⁸ Ma pi girdi’ nir e thingar ra ngongliyed ba Tent nib thothup ni tagal’ig, ya nge yag ni ug par u fithik’rad.

⁹ Ngar ngongoliyed nge urngin gathon nrogon ni bay gudag ngom.

Fare Kahol ko M’ag

¹⁰ “Mu ngongliyed ba Kahol ko ren ni acacia, ni aningeg i ragag nge lal e inch n’umngin, ma rliw’ nge medlip e inch radan, ma rliw’ nge medlip e inch tolngin.

¹¹ Mi gimed gabdiy e gol ni go’ gol u langgin ngu wuru’, miki gimed ayliy marichlen nib dub’ag ni gol ni go’ gol ni de ma’athuk ban’en ngay.

¹² Mi gimed ngongliy aningeg i luwaw nib ga’ mab gol ni fan ko feak mi gimed ayliy nga aningeg raba’ i ay, ni l’agruw nga barba’ ma l’agruw nga barba’.

¹³ Mi gimed ngongliy ruwley i mat’ ko gek’iy ni acacia ni kani ing ko gol

¹⁴ mu yuy’ed fagal ley i mat’ ngalan fapi luwaw ni bay u barba’ ngu barba’ fare Kahol.

¹⁵ Gal ley i mat’ ney e nge par u lan fapi luwaw ndab kun luf.

¹⁶ Mi gimed tay nga langgin fare Kahol fa gal raba’ i malang ni bay gu pi’ ngomed, ni kug yoloy fa ragag i motochiyel nga daken.

¹⁷ “Ma upongen fare kahol e ngam ngongliyed ko gol ni go’ gol, ni aningeg i ragag nge lal e inch n’umngin, ma rliw’ nge medlip e inch radan.

¹⁸ Mi gimed ammanag e gol ngeb ya’an l’agruw i Kerubim riy,

¹⁹ ni reb nga taban u baler fare upong, ma reb nga taban u baler. Mu ngongliyed niyow ba peth ko fare upong.

²⁰ Fa gali kerubim e ngan tayrow ni yow ba sabal u daken fare upong, ma bpuf porow nike fanay daken fare upong.

²¹ Mu ted nga langgin fare Kahol fagali yang i malang ni kan yoloy mi gimed ayliy upongen nga daken.

²² Bay gu mada’ nagmed u rom u daken upongen fare kahol, mu rom u thilin fa gali kerubim e bay gu pi’ riy ngomed urngin e motochiyel rog ni fan ngak e girdi’ nu Israel.

Fare tebel ntagil’ fare flowa ni kan ognag ngak Got

²³ “Mu ngongliyed ba tebel ko ren ni acacia ni guyey nge nel’ e inch n’umngin, ma ragag nge meruk e inch radan, ma rliw’ nge medlip e inch tolngin.

²⁴ Mi gimed ing wuru’ ku gol ni go’ gol, mi gimed liyeg e gol nib dub’ag u mirichlen.

²⁵ Mi gimed puthuy bang e ren ni dalip e inch radan ni nge liyeg. Mi gimed ing ko gol mirichlen e gi ren nem.

²⁶ Mi gimed ngongliy aningeg i luwaw nib ga’ maba gol, ra reb fa aningeg i tabthung min tay reb ngay, ko gin ni bay reb i ay riy.

²⁷ Pi luwaw nem e ngan tay nib chugur nga mirichlen fare tebel, ya ngi i kol fagal ley i mat’ ni yima kol ngu’un chibiy fare tebel ngay.

²⁸ Mu ngongliyed fagal ley i mat’ ko ren ni acacia min ing wuru’ ko gol.

²⁹ Mi gimed ngongliy e yu raba’ i plet ni fen e incense; nge boch e kap, nge boch e melor nge boch e dabiy ni fen e wayin ni yima ognag ngak Got. Urngin e pin’ey ma ngam ngongliyed ko gol ni dabi ma’athuk ban’en ngay.

³⁰ Fare tebel e ngam ted nga m’on ko fare Kahol ko M’ag, mu daken e re tebel ney e gubin ngiyal’ ni ngi i par riy fare flowa nib thothup ni kan pi’ ngog.

Fare tagil’ e magal

³¹ “Mu ngongliyed ba lay i tagil’ e magal ko gol ni go’ gol. Mu pirdi’iyed e gol nge mang enggin nge kenggin; ma nunuw riy e ya’an bogi floras nike puf nge tin dawori puf ni ngkun ngongliy nib peth ko re ley i tagil’ e magal ney.

³² Nel’ i pa’ngin e re tagil’ e magal ney, ra baraba’ i kenggin ma bay dalip i pa’ngin riy.

³³ Ra bpa’ fa nel’ i pa’ngin ma ngan tay e nunuw riy ni dalip i floras ni bod ya’an e floras ko almond ni tin ndawori puf nge tin kepuf.

³⁴ Ma kenggin fare tagil’ e magal e ngan tay e nunuw riy ni aningeg e floras ni ku bod ya’an e floras ko almond ni tin ndawori puf nge tin ke puf.

³⁵ Mra l’agruw pa’ fa nel’ pa’ i gek’iy ma bay reb e floras u enggin ni dawori puf.

³⁶ Pi floras ndawori puf ni nunuw riy nge yupa’ i papa’ngin, nge fare tagil’ e magal e ba peth nta’bang i gol nni pirdi’iy.

³⁷ Mi gimed ngongliy medlip i magal ni fen fare tagil’ e magal, ngam ted nga p’ebgul ni be gal ram’en nga m’on.

³⁸ Mu ngongliyed e pi fen e mthang magal riy nge pi plet riy ni gol ni go’ gol.

³⁹ Medlip i ragag nge lal e pawn e gol ni go’ gol ni ngam ngongliyed e re tagil’ e magal ney ngay nge urngin e tin mama’en.

⁴⁰ Mu tiyan’med ngam ngongliyed ni bod e re ya’an ni kug weliy rogon ngomed u daken fare burey.