Exodus 15 - Bible Ni Thothup

Tang rok Moses

¹ Me yin’ Moses nge piyu Israel e re tang ni ba’aray ngak SOMOL: “Nggu tangnag SOMOL, ya gel nike tay e rib sorok riy; ke yin’ fapi os nge pi’in ni kar afgad nga daken nga maday.

² I SOMOL e ir e yoror rog nib gel; Ir fa’anem nike ayuwegneg ni de buch ban’en rog. Ir e Got rog, ma bay u gog e sorok ngak, ma ir e Got rok e chitamag, bay gu tangnag feni gel gelngin.

³ I SOMOL e be’ ni girdi’en e mael; I SOMOL fithingan.

⁴ “Ke yin’ e pi chariot nge salthaw rok Farao nga maday; pi tolang ko salthaw rok ni yad ba falu’ e kar limochgad u lan fa gi day ni Red Sea fithingan.

⁵ Ke thareyrad e day nib dib’ag; ra ligilgad nga’ar ni bod ba malang.

⁶ “SOMOL, ba’ ni mat’aw i pa’am e rib th’ab feni gel; ke tet’ar e pi to’ogor kar yochyanggad.

⁷ Gelngim nib th’abi gel e ir e mu kirebnag ngay e pi’in yad be togopluw ngom; damumuw rom e gabulbul ngalang, me urfiyrad ni bod e ul.

⁸ Mu thoy daken e day me mu’ulung nga ta’bang nib tolang ngalang; nge par nib k’iy ngalang ni bod bangi rungrung; gin th’abi to’ar ko fa gi day e el nge par.

⁹ Me ga’ar e to’ogor, ‘Nggu lol’ograd nggu kolrad; mu gu tay e f’oth ko machaf rorad nggu fek gubin e tin gu ba’adag; bay gu girengiy e saydon rog nggu fek urngin e tin ni bay rorad.’

¹⁰ SOMOL, ri ta’abyay ni mu pag athon l’ugunam me thareyrad e day; miyad ligil nga’ar ni bod e plomow.

¹¹ “SOMOL, i mini’ u fithik’ e pi got e bod gur? I mini’ e bod gur nri gab thothup? I mini’ e rayag ni ngongliy e pi maang’ang me maruwel ni bod gur?

¹² Mu k’iyag e ba’ ni mat’aw i pa’am, me ful’ e but’ e to’ogor romad.

¹³ Mu par ni gab yul’yul’ ko tin ni mmicheg, ya mu gafaliy e pi girdi’ ni mu lagrad ko gafgow; gelngim e mu pow’iyrad ngay nga tafnam nib thothup.

¹⁴ Pi nam e rrung’aged murung’agen, miyad t’on ko marus; me m’ag e marus piyu Filistine.

¹⁵ Pi’in yad ma yog e thin u Edom e rrusgad; ma pi pumo’on ni falu’ u Moab e ra t’on gad ko marus; ma fapi girdi’ nu Kanaan e mulan’rad.

¹⁶ Marus nge magar e mul nga dakenrad; bochan feni gel gelngin pa’am miyad duwgil u luwrad ni gowa ba malang, nge mada’ ko ngiyal’ nike yib e girdi’ rom kar thumurgad a SOMOL, ni fapi girdi’ ni kam pithigrad ko sib ni ur ted.

¹⁷ Bay mu fekrad i yan ngam man mu tayrad ko burey rom, ni fa gin’em ni gur, SOMOL, e mu mel’eg ni tabnaw rom, ni fare Tempel ni ri gur e mu toy.

¹⁸ I gur, SOMOL, e pilung ndariy n’umngin nap’an.”

Tang rok Miriam

¹⁹ Yu Israel e ranod ngar th’abed e day nga barba’ u daken e but’ nib mlik. Machane nap’an ni yib e pi chariot rok yu Egypt nge pi os rorad nge pi’in yad be yannag nga maday, me fulweg SOMOL e day nge thareyrad.

²⁰ Mi Miriam, ni be’ ni bpin ni ba profet ni walagen Aron e fek e tambourine, ma urngin e ppin nra leked ni yad be chubeg e tambourine ni yad be churu’.

²¹ Me yin’ Miriam e re tang ni ba’aray ngorad, “Ngan tangnag SOMOL, ya gel nike tay e rib sorok riy; ke yin’ fapi os nge pi’in yad be yannag nga maday.”

Ran nib mo’oy

²² Moses e gafaliy e girdi’ nu Israel ngar chuwgad ko fare gi day ni Red Sea fithingan ngranod ngalan e ted ni desert u Shur. Dalip e rran ni ur milekaggad u daken e re gi ted nem ni desert, ma dar pir’eged e ran.

²³ Ma fa’anra tawgad nga Marah, ma dabiyag ni ngar unumed e ran riy, ya rib mo’oy, aram fan nni tunguy fithingan e gin’em ni Marah.

²⁴ Mu ur gun’gun’gad nib togopluw ngak Moses, miyad fith ngak ni lungurad, “Mang e nggu unumed?”

²⁵ Me meybil Moses ngak SOMOL ni be non ngak nri aram rogon u ngorongoren, me fal SOMOL owchen Moses nga ba ley i gek’iy; me fek Moses fare ley i gek’iy nge yin’ nga fithik’ e ran, me thil fare ran nge fel’ lamen. Me pi’ SOMOL e motochiyel ngorad ni ngar folgad riy, mu rom e ki sikeng nagrad riy.

²⁶ Me ga’ar, “Fa’an ri gimed ra fol ko thin rog, I gag SOMOL ni Got romed, mi gimed rin’ e tin nib m’agan’ug ngay ni aram e tin nib mat’aw, mi gimed tiyan’med ko tin kugog ni ngam rin’ed, mi gimed tay nga tagil’ urngin e tin kugog ni ngam folgad riy, ma dab gu gechig nagmed nga reb fapi liliy ni gu pag nga daken piyu Egypt. I Gag fare SOMOL, ni gag e ggol nagmed.”

²⁷ Me migid miyad yib nga Elim, ma bay ragag nge l’agruw i alublub u rom nge medlip i ragag kan e gek’iy ni palm; miyad n’uf e tent rorad u rom u to’oben e ran.