2 Samuel 22 - Bible Ni Thothup

Tangin e gel ko mael ni tay David

¹ Irera’ fare tang ni yin’ David ngak SOMOL ko fa ngiyal’nem ni ayuweg SOMOL David u pa’ Saul ngu pa’ yugu boch e pi to’ogor rok. I ga’ar:

² I SOMOL e ma ayuweg e pogofan rog; i ir e naun rog ni kan yororiy ni fan ko mael.

³ Got rog e ir e manaf rog, gu be par rok ndabi buch ban’en rog; ma yoror rog ni bod bangi shield nma fek e salthaw ngu’ur mithgad nga fon ko mael; ma par rog ndabi buch ban’en rog. Ir e ma ayuweg e pogofan rog; ma ayuwegneg ko ngiyal’ nike yib e cham ngog.

⁴ Kug non ngak SOMOL, ma ke ayuwegneg rok e pi to’ogor rog. Nga ni pining e sorok ngak SOMOL!

⁵ Yam’ e longobiyeg ni bod e n’ew, riya’ e yib nga dakenag ni bod e n’ew.

⁶ Yam’ e chichi’iy e gaf rok nga lukngug, ma low ko yam’ e tay e wup rok ni nggu aw ngay.

⁷ Gu non ngak SOMOL u fithik’ e gafgow ni yib ngog; gu non ngak e Got rog ni nge ayuwegneg. Me rung’ag lungug u tempel rok; i motoyil nga lungug ni gu wenig ngak ni nge ayuwegneg.

⁸ Ma aram me durru’ e but’ ngi i rur; me rur lanelang ngi i da’da’, ya ke damumuw Got!

⁹ Me po’ e ath u lan p’ethungun nga but’, me yib e daramram nge kol ni be gabulbul e nifiy riy u l’ugun nga but’.

¹⁰ Me guchuthuy lanelang nge mab nge yib riy nga but’ nib sak’iy nga daken bangi manileng nib talumor.

¹¹ I changeg u lang nga but’ ni bay u daken keru’ e kerubim; i yan nib machreg nike af nga daken pon e nifeng.

¹² Ma ke ing ir ko lumor; manileng nib dub’ag nib sug ko ran e ke yib i ing;

¹³ be gabulbul e pi achaffin ni be thethay ko uluch ni be mat u p’eowchen.

¹⁴ Me gagiyegnag SOMOL ngi i chub e dirra’ u lanelang, min rung’ag laman Got nib Th’abi Tolang.

¹⁵ I pag gan e gat’ing nge wereg e pi to’ogor rok; me gagiyegnag nge matmat e uluch miyad mil.

¹⁶ Me m’ug t’ay e regur, me chuw e upong u daken e pi def ko fayleng nap’an nra puwan’ SOMOL ngak e pi to’ogor rok me non ngorad ni ba ga’ laman u fithik’ e damumuw.

¹⁷ I SOMOL e k’iyag pa’ u tharmiy nge koleg; me girngiyeg nge chuwegneg u fithik’ e ran nib to’ar.

¹⁸ I chuwegneg u pa’ e pi’in yad be fanenikayeg, ngu pa’ e pi to’ogor rog nib thil gelngimad ni yad ba gel ngog!

¹⁹ Nap’an ni yib e gafgow ngog miyad og ngog, machane SOMOL e i yororiyeg.

²⁰ I ayuwegneg nggu chuw u fithik’ e riya’; i chuwegneg u fithik’ e riya’ ya gub fel’ u wan’.

²¹ I SOMOL e ke pi’ puluwog ya gub mat’aw; be ayuwegneg ya dawor gu bucheg ban’en.

²² Kug fol ko motochiyel rok SOMOL; dawor gu togopluw ngak e Got rog.

²³ Urngin e pi motochiyel rok ni gu be tay nga tagil’; dariy bingyal’ ni ku gu pag ni dag fol ko tin keyog ni ngan rin’.

²⁴ Manang ndariy e kireb ni kug rin’, ma kug teg u urel ko kireb.

²⁵ Ere ke pi’ puluwog ya gub mat’aw, ya manang ndawor gu bucheg ban’en.

²⁶ SOMOL, i gur e ga ma yul’yul’ ngak e pi’in yad ba yul’yul’ ngom, ma ri gab gol ngak e pi’in yad ba yal’uw.

²⁷ Pi’in nib machalbog e gab thothup u wun’rad, ma pi’in kireb e ga be par ndar fel’gad u wun’um.

²⁸ Pi’in ba sobut’an’rad e ga ma chuwegrad u fithik’ e gafgow, ma ga ma sobut’nag e pi’in nib tolangan’rad.

²⁹ SOMOL, i gur e tamilang rog; gur e kam chuweg e lumor ni ug par u fithik’.

³⁰ Gur e ga ma pi’ gelngig ni nggu og ngak e pi to’ogor rog, ma ga ma pi’ gelngig nggu t’ar e yoror rorad nga dakenrad.

³¹ Re Got ney e rib yal’uw e ngongol rok, thin rok e rayag ni ngan toer ngay ya der ma thil! Ir e bod bang i shield nma pilig e salthaw e pi talin e cham ngay, be par ni aray rogon u puluwon urngin e pi’in yad ma mil ngak ni nge yoror rorad.

³² Kemus ni SOMOL e ir e Got; kemus ni Got e ir e yoror rodad.

³³ I Got e ba manaf nib gel ni gu ma naf ngay, ma gagiyeg nigeg u daken e kanawo’ ni gu be yan riy ni nge dabi buch ban’en rog.

³⁴ Ma gagiyegnag e rifrif u eg nggu wan gu tay nib mudugil ni bod e rifrif u ay ba gamanman ni dir; ma gagiyegnag nge dabi buch ban’en rog u daken e pi burey.

³⁵ Ma sukul nigeg ni fan ko mael, ya nge yag ni gu maruwel ko bin th’abi gel e gat’ing.

³⁶ SOMOL, mu yoror rog ma ga be ayuweg e pogofan rog; ayuw ni kam tay ngog e ke gilnag buguwag.

³⁷ Kam gagiyegnag gu be par ndawor gu yag rok e pi to’ogor rog, ma dawor gu waer.

³⁸ Gu ma lol’oeg e pi to’ogor rog nggu li’rad; dagur ma tal nge mada’ ko ngiyal’ ni kug gel ngorad.

³⁹ Gu ra li’rad, ma dabkiyag ni ngar sak’iygad; miyad par u but’ u to’oben e rifrif rog ni kar waergad.

⁴⁰ Ga ma pi’ gelngig ni fan ko mael, ma ga ma gagiyegnag ngug gel ngak e pi to’ogor rog.

⁴¹ Ga ma gagiyegnag e pi to’ogor rog ngar milgad rog; mu gu li’ e pi’in yad be fanenikayeg.

⁴² Yad be gayiy e ayuw, ma dariy be’ nrayag rok ni nge ayuwegrad; yad be non ngak SOMOL, machane der fulweg lungurad.

⁴³ Kug pirdi’iyrad kar pired ni yad bod e fiyath; gu be yit’yit’rad nga but’ ni bod e rungdu’ u daken e kanawo’.

⁴⁴ Kam ayuwegneg u pa’ e girdi’ ko nam rog nra togopluwgad ngog, kam teg ni gag e gu be gagiyegnag e pi nam; girdi’ ni ug par nda gu nang owcherad e gag e gu be gagiyeg nagrad e chiney.

⁴⁵ Girdi’ nu bang e yad be siro’ u p’eowcheg; yad ra rung’ag e tin kugog miyad fol riy.

⁴⁶ Ke mulan’rad, kar paged e yungi n’en nra yororiyed ni fan ko mael karbad ni yad be t’on ko marus.

⁴⁷ I SOMOL e be par nib fos! Nga ni pining e sorok ngak e en ni be yoror rog! Got e be’ nib gel ni be ayuweg e pogofan rog! Nga ni weliy ngak e girdi’ feni sorok!

⁴⁸ Ma gagiyeg nigeg ngug gel ngak e pi to’ogor rog; ma tay e girdi’ nga tan pa’ag ngu’ug gagiyeg nagrad,

⁴⁹ ma chuwegneg u pa’ e pi to’ogor rog. SOMOL, i gur e ga ma gagiyeg nigeg ngug gel ngak e pi to’ogor rog, ma ga ma yororiyeg rok e pi’in yad ma cham ngog.

⁵⁰ Ere bay ug pining e sorok ngom u fithik’ e pi nam; bay ug tang nigem ni gu be pining e sorok ngom.

⁵¹ En ni Got e turguy ni nge mang pilung e Got e be gagiyegnag be gel ko to’ogor rok; be dag ngak e en ni ir e turguy ni be par e t’ufeg rok u daken ndabi thil, ni be dag ngak David nge pi’in ni owchen ndariy n’umngin nap’an.