2 Kronicles 27 - Bible Ni Thothup

Jotham ni Pilung nu Judah

¹ Jotham e rliw’ nge lal e duw yangren me mang pilung, me gagiyeg u Jerusalem ni ragag nge n’el e duw. Chitiningin e Jerushah ni be’ ni bpin ni fak Zadok.

² Jotham e i rin’ e tin nib m’agan’ SOMOL ngay, nri bod ni i rin’ e chitamngin; machane de bod e chitamngin ni denen ni bochan e urfiy e incense u lan fare Tempel. Machane girdi’ e dar talgad ko denen.

³ I Jotham e ir e ngongliy fare Garog ko Lel’och ko fare Tempel miki muruwliy boch e maruwel nib yo’or ko rungrung ko fare binaw u lan bangi n’en nu Jerusalem ni kanog yu Ofel ngay.

⁴ Mu daken yungi ted nu Judah e sunmiy bogi binaw riy, mu lan e loway e toy bogi yoror riy ni fan ko mael nge pi tagil’ e damit.

⁵ Me mael nib togopluw ko pilung nu Ammon nge salthaw rok nge gel ngorad. Ma aram me motogel ko pi yu Ammon ngu’ur pi’ed e wolbuw ngak ni yu duw u dalip e duw: ni aningeg e ton e silber, wugem e bbiyu’ e barril e wheat, nge wugem bbiyu’ e barril e barley.

⁶ Me gel gelngin Jotham i yan ni bochan e i yul’yul’ ngi i fol rok SOMOL ni Got rok.

⁷ Tin kabay ni i rin’ Jotham u nap’an e gagiyeg ni i tay, ni bod e pi mael, nge pi motochiyel ni i ngongliy, e go’ ka ni yoloy ngalan fare babyor ni Chepin e Pilung nu Israel ngu Judah.

⁸ Jotham e rliw’ nge lal e duw yangren me mang pilung, me gagiyeg u Jerusalem ni ragag nge n’el e duw.

⁹ Me yim’ mi ni k’eyag u lan fare Binaw rok David me yan Ahaz nib mo’on ni fak nga luwan nge mang pilung.