1 Kronicles 16 - Bible Ni Thothup

¹ Miyad fek fare Kahol ko M’ag i yan ko fare tent nike fal’eg David rogon ni fan ngay ngar ted nga langgin. Aram miyad pi’ ngak Got e pi maligach ni mo’oruf nge pi maligach nma gapaseg thilin Got nge girdi’.

² Nga tomuren nike mu’ David i pi’ fapi maligach me fal’eg wa’athan e girdi’ u fithingan SOMOL

³ me pi’ e ggan ngorad ni yad gubin. Ra reb e pumo’on nge bpin nu Israel me pi’ reb e lof ngak nge bang e ufin ni mo’oruf nge boch e raisin.

⁴ Me mel’eg David boch e girdi’ ko Levi ni ngar gagiyeg niged rogon e liyor ngak SOMOL ni Got nu Israel, u mit fare Kahol ko M’ag, ko tang nge sorok ni yibe pining ngak.

⁵ Min duwgiliy Asaf ni ir e ngi i gagiyeg me Zekariah e ta’ayuw rok. Me Jeyel, Shemiramoth, Jehiel, Mattithiah, Eliab, Benayah, Obed Edom, nge Jeyel e ngar musikgad ko harp. Asaf e nge musik ko cymbal,

⁶ ma gal prist, ni Benayah nge Jahaziel, e ngar thoyew e rappa’ ni gubin e rran u mit fare Kahol ko M’ag.

⁷ Ma aram e ngiyal’ nsom’on ni pi’ David mat’wun Asaf nge boch e pi Levite ni yad e ngar tanggad ni yad be pining e sorok ngak SOMOL.

Ba tangin e sorok

⁸ Ngu’un pining e magaer ngak SOMOL, min weliy feni sorok; ngan weliy ngak e pi nam e tin ke rin’.

⁹ Ngan tangnag e sorok ngak SOMOL; min weliy feni fel’ e pin’en ke rin’.

¹⁰ Ngam felfelan’gad nike mil fadad ngak; nge felfelan’ gubin e pi’in yad ma liyor ngak!

¹¹ Mmarod ngak SOMOL nge aywegmed, min liyor ngak ni gubin ngiyal’.

^12-13 Gimed e pi’in owchen Jakob, ni tapigpig rok Got, pi’in owchen yu Israel, ni Got e mel’eg, dabi m’ay u wan’med e pi maang’ang ni ngongliy Got nge tin nib mat’aw ni turguy.

¹⁴ I SOMOL e Got rodad; tin keyog ni ngan rin’ e fan ko fayleng ni ga’ngin.

¹⁵ Dariy bangiyal’ ni ngam paged talin fare m’ag rok Got, ni ngongliy ni nge par ni manemus,

¹⁶ fare m’ag ni ngongliy u thilrow Abraham, me mownag ngak Isak.

¹⁷ I SOMOL e ngongliy reb e m’ag u thilrow Jakob, bm’ag nra par ni manemus.

¹⁸ I ga’ar, “Bay gu pi ngom fare nam nu Kanaan, bayi par nike milfan ngom.”

¹⁹ Girdi’ rok Got e yad buchu’uw, bogi milekag u lan fare nam nu Kanaan.

²⁰ U ranod u reb e nam nga reb, ngu gil’ilungun reb e pilung nga reb.

²¹ Machane de pag Got be’ nge gafgow nagrad; bochan ni nge yoror rorad me motochiyel ko pi pilung ni ga’ar:

²² “Dab mu gafgow niged e pi tapigpig rog ni kug mel’egrad; dabi math pa’med ngak e pi profet rog.”

²³ Fayleng ni ga’ngin, mu tang niged SOMOL! Mogned ni gubin e rran fare thin ni bfel’ ni ir e ke mat’aw nagdad.

²⁴ Mogned feni gil ko pi nam, nge feni manigil rogon e maruwel rok ngak gubin e girdi’.

²⁵ I SOMOL e rib ga’ ma bin th’abi tolang e sorok e nganog ngak; ir e ngan mathangeluwolnag u fithik’ urngin e pi got.

²⁶ Pi got rok gubin e pi nam e kemus ni bogi liyos, machane SOMOL e ir e sunmiy e pi tharmiy.

²⁷ Malup’lup’ rok nge feni rir e ke liyeg, gel nge felfelan’ e ba suguy e Tempel rok.

²⁸ Ngu’um pininged e sorok ngak SOMOL, gimed gubin e girdi’ nu fayleng, ngu’un pining e sorok nga falngin nge feni gel.

²⁹ Ngu’un pining e sorok nga fal’ngin fithingan SOMOL; ngan fek ba maligach nganib ngalan e Tempel rok. Min siro’ ngak Facha’ rib Thothup nnap’an nra yib i m’ug;

³⁰ fayleng ni plo’ mu durru’ u p’eowchen! Fayleng e ba ayal ni rdabi n’ag gil’.

³¹ Fayleng nge lanelang, mu felfelan’ gow! Mognew ngak e pi nam ni SOMOL e pilung.

³² Day mu tolul nge gubin mit e yafos ni bay u fithik’am; pi flang nge gubin e yafos u dakenmed mu felfelan’gad!

³³ Pi yuke gek’iy nu lan e loway e bay ra garus niged e felfelan’ nnap’an nra yib SOMOL ni nge gagiyegnag e fayleng.

³⁴ Ngu’un pining e magaer ngak SOMOL, ni bochan e ir e bmanigil; ya t’ufeg rok e dabimus bi’id.

³⁵ Nge lunguy ngak, “Got ni Tabyul romad mu ayuwegmad; mu kunuymad nga ta’bang; mu ayuwegmad u pa’ e pi nam, ya nge yag ni gu pininged e magaer magmad mathangeluwolnag fithingam nib thothup.”

³⁶ Ngu’un pining e sorok ngak SOMOL ni fare Got nu Israel! Ngu’un pining e sorok ngak e chiney i yan ngaram ndariy n’umngin nap’an! Ma aram me ga’ar e girdi’ ni gubin, “Amen,” ke sorok SOMOL.

Liyor ni un tay u Jerusalem ngu Gibeon

³⁷ I David ni Pilung e tay Asaf nge boch piyu Levi ni yad e ke milfan rogon e liyor ni ngu’un tay ko gin bay fare Kahol ko M’ag riy. Yad e ngu’ur pigpiggad u rom ni gubin e rran.

³⁸ Obed Edom nib mo’on ni fak Jeduthun nge nel’ i ragag nge meruk i pumo’on ni yad ta’ab ke girdi’ e ur ayuweged e pi cha’nem. Hosah nge Obed Edom e ba milfan i matnagiy fapi garog ngorow.

³⁹ Zadok ni prist nge pi prist ni chonggin e yad e ke milfan ngorad rogon fare liyor ngak SOMOL ko gin tagil’ e meybil u Gibeon.

⁴⁰ Gubin e kadbul nge blayal’ ma yad ma urfiy e maligach ni gamanman nik yu reb u daken fare altar ni rogon ni kan yoloy ngalan fare Motochiyel nike pi’ SOMOL ngak yu Israel.

⁴¹ Ma immoy rorad i Heman nge Jeduthun nge ku boch e girdi’ ni kun mel’egrad ni ngu u ron’ed tangin e sorok ngak SOMOL ni fan ko t’ufeg rok ni manemus.

⁴² Heman nge Jeduthun e ku yow e ba mifan ngorow fapi rappa’ nge pi cymbal nge tin kabay e talin e musik ni yima chubeg u nap’an ni yibe yin’ fapi tangin e sorok. Chonggin fare ke girdi’ rok Jeduthun e yad e ba milfan fapi garog ngorad ni ngu’ur matnagiyed.

⁴³ Ma aram ma ra be’ me sul nga tafen, me sul David nga tafen ni nge par boch rok gathon e tabnaw rok.