1 Kronicles 14 - Bible Ni Thothup

Pin’en ni i rin’ David u Jerusalem

¹ Hiram ni Pilung nu Tyre e l’oeg boch e tolang ko salthaw ngak David; nike un ngorad e pi’in salap ko dumow naun, nge girdi’en e fal’eg malang, nge yuley i ren ni cedar nib gaman ni ngan toy ba naun ko pilung ngay.

² Ma aram me nang David ni SOMOL e ke tay ni nge mang pilung nu Israel ma be ngongliy gil’ilungun ni nge fel’fel’ rogon ni fan ngak e girdi’ rok.

³ Mu rom u Jerusalem e le’engiy David boch e ppin riy nge yag e pagel nge ppin ni pifak nib yo’or.

⁴ Tin ba’aray e bitir e ndiyennag rok u Jerusalem: I Shammua, Shobab, Nathan, Solomon,

⁵ Ibhar, Elishua, Elpelet,

⁶ Nogah, Nefeg, Jafia,

⁷ Elishama, Beeliada, nge Elifelet.

Gel nta’ ngak piyu Filistia

⁸ Nap’an ni rung’ag piyu Filistia ni aram e kemang David e pilung ko fare nam nu Israel ni ga’ngin, me yan fa raba’ i salthaw rorad ni ngar koled. Me yan David ni nge mada’ nagrad.

⁹ Me taw piyu Filistia ngalan fare Loway ni Refaim miyad tabab i giliwnag.

¹⁰ Me fith David Got ni ga’ar, “Bfel’ u wun’um ni gu ra mael ngak e Filistia? Ga ra gel nigeg?” Me fulweg SOMOL ni ga’ar, “Errogon, mmael ngorad! Gu ra gel nagem!”

¹¹ Ma aram me mael David ngorad u Baal Perazim nge gel ngorad. Me ga’ar, “Ke maruwel Got ngog kug thumur u fithik’ fa raba’ i salthaw ni to’ogor ni bod e sugubur.” Ere re gin’em e nni tunguy fithingan ni Baal Perazim.

¹² Nap’an ni mil piyu Filistia miyad digey e pi liyos rorad, me pi’ David e thin ni ngan urufiy ni gubin.

¹³ Ma ku de n’uw nap’an miki sul piyu Filistia ko fare loway ngkur tababgad i giliwnag bayay.

¹⁴ Miki fith David laniyan’ Got bayay, me fulweg ni ga’ar, “Dab mman u roy ni cham ngorad, mu cheal nga ba’nem rorad ngam fal’eg rogom ni ngam og ngorad u charen fa yuke gek’iy ni balsam.

¹⁵ Ma nap’an ni ga ra rung’ag lingan tamal’gun e gek’iy ni bod lingan yu raba’ i salthaw ni be yib, ma aram mag og ngorad, ni bochan e bay gu wan nggu m’on rom ni ngu gel ko fa raba’ i salthaw rok piyu Filistia.”

¹⁶ Me rin’ David e tin keyog Got, aram me tuluf piyu Filistia u Gibeon ngar mada’gad nga Gezer.

¹⁷ Me garer bugwan David u gubin yang nib sorok, me pingeg SOMOL gubin e nam ngar rusgad ngak.