1 Korinth 11 - Bible Ni Thothup

¹ Ere um folwokgad rog, ni bod rogon ni gu be folwok rok Kristus.

Upunguy lolugey u ngal’an e meybil

² Kugog e sorok ngomed ni bochan e gubin ngiyal’ ni gu bay u wun’med ma gimed be fol ko pin’en ni ug machibnag ngomed.

³ Machane gub adag ni ngam nanged fan ni Kristus e ir e lolugen urngin e pumo’on, ma pumo’on e ir lolugen leengin, mi Got e lolugen Kristus.

⁴ Re mo’on nra meybil ara machibnag e thin rok Got ngak e girdi’ u fithik’ girdi’en Kristus nike mu’ulung nike upunguy lolugen e be n’ag fan Kristus.

⁵ Ma re pin nra meybil ara machibnag e thin rok Got ngak girdi’en Kristus nike mu’ulung ndariy ban’en nike upunguy nga lolugen e be n’ag fan figirngin; ya dariy ban’en nib thil rok nge be’ ni bpin ni kan puy piyan lolugen kem’ay.

⁶ Fa’anra dabi upunguy fare pin lolugen ma kabfel’ nra th’ab piyan lolugen nge m’ay. Ma bochan e ra tamra’ be’ ni bpin ngay ni ngan th’ab piyan lolugen nge m’ay ara nth’ab nge ngoch, ma aram fan ni susun e nge upunguy lolugen.

⁷ Ma be’ nib mo’on e dariyfan ni nge upunguy lolugen, ya be m’ug rok rarogon Got nge fel’ngin Got nike af ngak. Machane ppin e be m’ug rok fel’ngin e pumo’on nike af ngak;

⁸ ya pumo’on e gathi nsunumeg rok e ppin, ya ppin e nsunumeg, rok e pumo’on;

⁹ ma gathi nsunumeg e pumo’on ni fan ngak e ppin, ya ppin e nsunumeg ni fan ngak e pumo’on.

¹⁰ Bochan e pi engel ma aram fan ni nge reb e bpin me upunguy lolugen nge dag ni bay u tan pa’ figirngin.

¹¹ Machane ra gadad be par rok Somol, ma ppin e gathi be par ndariyfan e pumo’on ngak, ma pumo’on e gathi dariyfan e ppin ngak.

¹² Ya ppin e nsunumeg rok e pumo’on, ma ku aram rogon ni ppin e be gargeleg e pumo’on; ma urngin ban’en ni Got e yib rok.

¹³ Mu tafinay niged: bmat’aw ni nge meybil be’ ni bpin ngak Got u lan e mu’ulung rok girdi’en Kristus ndariy ban’en nike upunguy nga lolugen?

¹⁴ Rogon lanin’med e be yog ngomed ni piyan lolugen be’ nib mo’on nike n’uw e ke darifannag fa’anem,

¹⁵ machane ban’en ni gamgon e ppin. Piyan lolugen nib n’uw e ka ni pi’ ngak ni nge mang upong u lolugen.

¹⁶ Machane fa’anra der fel’ u wan’ be’ ni ba’adag ni ngan lu’ag murung’agen, ma tin ni nggog e gamow nge pi galesiya rok Got i yan e dakuriy yugu reb e yalen ngabang nma rin’ ulungen girdi’en Kristus ko ngiyal’ ni yibe meybil ngak Got.

Abich ni blayal’ rok Somol

¹⁷ Machane pin’en ni ba’aray e der ta’reb lanin’ug riy ngomed; ya pi mu’ulung ni gimed be tay girdi’en e galesiya romed e bo’or e kireb ni be yib riy ko tin ni bfel’.

¹⁸ Bin som’on e kanog ngog nike yu raba’ girdi’en e galesiya romed yad be togopluw ngorad; ma re bugithin ney e gu be finey ni bochi yang riy e riyul’.

¹⁹ (Bmuduwgil nthingar mu yuraba’gad u fithik’med, nge yag ni gagiyel e pi’in nib mat’aw.)

²⁰ Fa’anra mmu’ulunggad ma gathi kam mu’ulunggad ni fan ko abich ni blayal’ rok Somol.

²¹ Ya gimed ra abich mra bigimed me kay e tirok’ e ggan, me par boch i gimed ndawori fos ma boch i gimed e ke garbod ke pag rogon ke chingnag.

²² Gur ra bigimed ma dariy e tabinaw rok nra kay ban’en riy me garbod riy? Fa gimed ba’adag ni ngam darifan niged e galesiya rok Got mi gimed tamra’nag e pi’in ndariy ban’en rorad? Mang e gimed be finey ni bay gog ngomed u murung’agen e re bugithin ney? Gur nggog e fel’ ngomed riy? Bmuduwgil ndab gog e fel’ ngomed riy!

²³ Ya tin kug weliy ngomed e yag ngog rok Somol ni fa’ani lungug: ye Somol Jesus, ko re neap’ nni yagnag, e fek e flowa,

²⁴ nge pining e magaer riy ngak Got, me t’ar me ga’ar, “Ireray dowag ni fan ngomed. Um rin’ed ni aray rogon ngi i pugurag ngomed.”

²⁵ Ma ku aram rogon ni fek fare kap u tomuren e abich ni blayal’ me ga’ar, “Re kap ney e bin nib be’ech e m’ag u thilin Got nge girdi’, ni racha’eg e bayi micheg. Ngiyal’ ni gimed ra unum e n’en ni bay riy e ngam rin’ed ni nge pugurag ngomed.”

²⁶ Ya ngu’um weliyed murung’agen e yam’ ni tay Somol ko ngiyal’ ni gimed ra kay e re flowa ney mi gimed unum e n’en ni bay ko re kap ney nge yan i mada’ ko ngiyal’ ni bayi sul Somol riy.

²⁷ Aram fan ni fa’anra kay be’ e flowa rok Somol ara unum e n’en ni bay u kap rok ndariyfan u wan’, ma aram e ke denen, ya ke darifannag downgin nge racha’en Somol.

²⁸ Aram fan nra be’ ma nge fith ir u laniyan’, nge mu’ mfini kay fare flowa me unum e n’en ni bay ko fare kap.

²⁹ Ya fa’anra kay e re flowa nem me unum e n’en ni bay ko fare kap nder leamnag downgin Somol nge fan, ma aram e ke girengiy e gechig nga daken ni fan e ke kay e re flowa nem ma ke unum e n’en ni bay ko fare kap.

³⁰ Aram fan ni bo’or i gimed e ke m’ar ke me’waer, ma boch e ke yim’.

³¹ Ma fa’anra bagadad me fith ir ko som’on, ma dabiyag ni nge yib e gechig rok Got nga dakendad.

³² Machane be gechig nagdad Somol ni fan e nge dabi unegdad ngak e girdi’ nu fayleng nge gechig nagdad.

³³ Ere pi walageg ni girdi’en Kristus, fa’anra mmu’ulunggad ni ngam ked e ggan rok Somol ma ngam son niged gimed.

³⁴ Ma fa’anra ke yib e bilig ngak be’, ma nge abich u tafen, nge dabi yib e gechig rok Got nga daken bigimed ko ngiyal’ ni gimed ra mu’ulung. Ma tin ni kabay ban’en e bay fini gub ma gadad weliy murung’agen.